Búgin, 21-fevral kúni Ájiniyaz atındaǵı Nókis mámleketlik pedagogikalıq institutı sport kompleksinde respublikamızda besinshi márte ótkerilip atırǵan «Bes baslama olimpiadası hám paralimpiadası» joybarlarınıń 2026-jıldaǵı máwsiminiń saltanatlı ashılıw máresimi bolıp ótti.

Ilajǵa Qaraqalpaqstan Respublikası Sport ministrligi, Jaslar isleri agentligi Qaraqalpaqstan Respublikası basqarması, Máhálleler awqamı Qaraqalpaqstan Respublikası basqarması wákilleri, «Bes baslama olimpiadası»nıń aldınǵı máwsiminiń jeńimpazları hám sıylı orın iyeleri, ulıwma bilim beriw mektepleriniń oqıwshıları, joqarı oqıw orınlarınıń studentleri, belgili sportshılar qatnastı.

Respublika boylap onlayn telekópir arqalı bolıp ótken ashılıw máresiminde sózge shıqqanlar Prezidentimizdiń baslaması menen jolǵa qoyılǵan bul sistema qısqa waqıttıń ishinde ulıwma milliy háreketke aylanǵanlıǵın atap ótti. Ótken jılı shólkemlestirilgen komandalıq sport jarıslarında 15 million adamnıń úlken qızıǵıwshılıq penen belsene qatnasqanlıǵı bul pikirdiń ayqın dálili esaplanadı.

Atap ótiw orınlı, ótken jılı «Bes baslama olimpiadası» juwmaqları boyınsha Qaraqalpaqstan Respublikası ulıwma komandalıq esapta 3-orındı iyelegen edi.

Ilajda sózge shıqqanlar xalqımız, ásirese, jaslarımızdı usı joybar sheńberinde ótkeriletuǵın jarıslarǵa belsene qatnasıwǵa shaqırdı.

NMPI baspasóz xızmeti.