Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Ishki isler ministrligi Jámiyetlik qáwipsizlik xızmeti huqıqbuzarlıqlar profilaktikası basqarması baslıǵınıń orınbasarı, podpolkovnik Húrzada Reyimqulova qatnasıwında «Basshı hám jaslar» ushırasıwı shólkemlestirildi.

Ushırasıwdan gózlengen maqset – jaslar arasında huqıqbuzarlıqlardıń aldın alıw, olardıń huqıqıy sawatlılıq dárejesin arttırıw hám jınayatshılıqqa qarsı gúresiwde profilaktikalıq ilajlardıń áhmiyetin keń túrde úgit-násiyatlawdan ibarat boldı.

Ilajǵa fakultet dekanlarınıń jaslar menen islesiw boyınsha orınbasarları, instituttıń profilaktikalıq inspektorları, tyutorlar hám studentler qatnastı.

Ushırasıwda podpolkovnik Húrzada Reyimqulova sózge shıǵıp, búgingi kúnde jaslar tárbiyası, olardıń bos waqtın mazmunlı shólkemlestiriw, zıyanlı illetler hám hár qıylı unamsız aǵımlardan qorǵaw máseleleri áhmiyetli ekenligin atap ótti. Sonday-aq, huqıqbuzarlıqlardıń júzege keliw sebepleri, olardı erte anıqlaw hám aldın alıw boyınsha ámelge asırılıp atırǵan sistemalı jumıslar haqqında tolıq maǵlıwmat berdi.

Ushırasıw ashıq sáwbetlesiw tárizinde ótkerilip, studentler ózlerin qızıqtırǵan sorawlarǵa qánigeden tolıq juwap aldı. Atap aytqanda, jaslar arasında kiberqáwipsizlik, náshebentlikke qarsı gúresiw, zorlıq hám jınayatshılıqtıń aldın alıw baǵdarındaǵı máseleler dodalandı.

Ilaj sońında jaslardıń huqıqıy mádeniyatın jetilistiriw, olardıń jámiyettegi belsendiligin arttırıw, sonday-aq, nızam ústemligin támiyinlew hár qashanǵıdan da áhmiyetli bolıp qalatuǵınlıǵı atap ótildi.

NMPI baspasóz xızmeti.