Búgin, 25-fevral kúni Ájiniyaz atındaǵı Nókis mámleketlik pedagogikalıq institutında jaslar menen islesiw hám ruwxıy-aǵartıwshılıq baǵdarındaǵı jumıslardıń nátiyjeliligin arttırıw boyınsha ámelge asırılıp atırǵan ilajlarǵa arnalǵan ashıq sáwbetlesiw bolıp ótti.

Ilajǵa respublikalıq hám jergilikli ǵalaba xabar quralları wákilleri hám jurnalistler qatnastı.

Ashıq sáwbetlesiwde dáslep institut juwapkerleri ámelge asırılıp atırǵan jumıslar haqqında maǵlıwmat berdi.

Bıyılǵı oqıw jılında institutta ruwxıy-aǵartıwshılıq jumıslar sistemalı túrde jolǵa qoyılıp, jaslardı hár tárepleme jetik, Watanǵa sadıq, erkin pikirleytuǵın hám joqarı mánawiyatlı etip tárbiyalaw baslı maqset etip belgilendi.

Institutta salamat sociallıq-ruwxıy hám psixologiyalıq ortalıqtı qáliplestiriw, bilimlendiriw mákemesiniń abıroyın arttırıw hám joqarı qánigeli kadrlar tayarlawǵa kómeklesiw maqsetinde keń kólemli jumıslar ámelge asırılmaqta.

Studentlerdiń jámiyetlik-siyasiy hám huqıqıy bilimlerin arttırıw maqsetinde Ózbekstan hám Qaraqalpaqstan Respublikalarınıń Konstituciyası kúnlerine arnalǵan ilimiy-ámeliy konferenciyalar turaqlı ótkerilmekte. Prokuratura hám ishki isler uyımları menen birgelikte dógerek sáwbetleri hám ushırasıwlar shólkemlestirildi.

Hár hápteniń piyshembi kúni «Profilaktika kúni» sıpatında belgilenip, tiyisli taraw wákilleri hám instituttıń profilaktikalıq inspektorları menen birgelikte diniy ekstremizm, terrorizm, korrupciya, adam sawdası, náshebentlik hám basqa unamsız illetlerdiń aldın alıwǵa baǵdarlanǵan úgit-násiyat ilajları ótkeriledi. Sonnan 2025-jıl dawamında 600 den aslam, 2026-jıldıń yanvar-fevral aylarında bolsa 180 nen aslam ruwxıy-aǵartıwshılıq ilajları shólkemlestirildi.

Institutta belgili shayır hám jazıwshılar menen 13 márte dóretiwshilik ushırasıwlar, Áliysher Nawayı, Zahiriddin Muhammed Babur, Ámir Temur, Ájiniyaz Qosıbay ulı, Berdaq Ǵarǵabay ulı sıyaqlı ullı tulǵalardıń ómiri hám dóretiwshiligine baǵıshlanǵan ádebiy kesheler shólkemlestirildi. Sonday-aq, studentlerdiń teatr hám muzeylerge turaqlı túrde barıwı jolǵa qoyılǵan.

Házirgi waqıtta institutta ulıwma 82 dógerek hám klub jumıs alıp barıp atırǵan bolıp, olarǵa ulıwma 6727 student qamtıp alınǵan. Sonnan, 32 pán, 16 sport, 22 ruwxıy-aǵartıwshılıq, 10 ónermentshilik baǵdarındaǵı dógerekler, «Tumaris» qosıq hám ayaq-oyın xalıq ansambli, «Sıy perde», «Tarannum», «Baldáwren» ansamblleri, «Turan» komandası, «Ziyalı jaslar» hám «Debat» intellektual klubı qábiletli, bilimli, ziyrek studentlerdi birlestirmekte.

Studentler respublikalıq hám xalıqaralıq kólemdegi tańlaw hám jarıslarda belsene qatnasıp, sonnan 75 student xalıqaralıq, 301 student respublikalıq kólemde jeńimpaz boldı.

Institut sport klubı tárepinen 12 túrdegi sport baǵdarlarında shınıǵıwlar jolǵa qoyılǵan bolıp, 630 student, sonıń ishinde, 227 student-qız sport penen turaqlı shuǵıllanbaqta. Oqıw jılı dawamında «Universiada», «Bes baslama olimpiadası», «Studentler ligası», «Rektor kubogi» sıyaqlı sport jarısları hám salamatlıq ilajları shólkemlestirildi.

Ózbekstan Respublikası Prezidenti tárepinen alǵa qoyılǵan bes áhmiyetli baslama sheńberinde institutta 43 klub hám dógerek jumıs alıp barıp atırǵan bolıp, olarǵa 8404 student qamtıp alındı. Bul baǵdarlarda oqıw jılı dawamında 126 ilaj ótkerildi. Sonday-aq, studentler turaq jaylarında «Bes baslama» xanaları hám kitapxanalar shólkemlestirildi.

Prezident qararına muwapıq, Nókis qalası hám Ellikqala rayonındaǵı 11 máhállede jámlespegen jaslar menen sistemalı jumıslar jolǵa qoyıldı. Atap aytqanda, aymaqlarda 29 sport jarısı, 36 úgit-násiyat ilajları bolıp ótti. Máhálle jasları instituttıń sport maydanshalar hám málimleme-resurs orayınan turaqlı paydalanbaqta.

Álbette, ámelge asırılıp atırǵan bunday ilajlar student-jaslardıń ruwxıy jetikligi, huqıqıy sawatlılıǵı, salamat turmıs tárizi hám jámiyetlik belsendiligin arttırıwǵa xızmet etpekte.

Ashıq sáwbetlesiw dawamında ǵalaba xabar quralları wákilleri ózlerin hám keń jámiyetshilikti qızıqtırǵan sorawlarǵa tolıq juwaplar aldı.

Ájiniyaz atındaǵı Nókis mámleketlik pedagogikalıq institutı baspasóz xızmeti.