Ájiniyaz atındaǵı Nókis mámleketlik pedagogikalıq institutında pitkeriwshi kurs studentleriniń bántligin támiyinlew hám olardıń isbilermenlik baslamaların qollap-quwatlawǵa baǵdarlanǵan «Keleshekke qádem» baǵdarlaması sheńberinde gezektegi seminar-trening shólkemlestirildi.

Ilajǵa «Ózmilliybank» akcionerlik jámiyeti Qaraqalpaqstan Respublikası boyınsha filialınıń qánigesi Klara Sharipova, Oliy Majlis Nızamshılıq palatası janındaǵı Jaslar parlamenti jaslar isbilermenligi, básekini rawajlandırıw hám sanaat máseleleri komitetiniń baslıǵı, «RBG Company» kompaniyasınıń tiykarshısı, isbilermen Babur Rajabov, instituttıń «Keleshekke qádem» orayı juwapkerleri, pitkeriwshi kurs studentleri qatnastı.

Seminardıń tiykarǵı maqseti – pitkeriwshi jaslardı miynet bazarına tayarlaw, olardıń kásiplik kónlikpelerin bekkemlew, jumısqa ornalasıw procesinde zárúr bolatuǵın bilim hám kónlikpelerdi qáliplestiriw hám isbilermenlik jumısların baslawǵa kómeklesiwden ibarat.

Seminar-trening dawamında qánigeler tárepinen miynet bazarında talap joqarı bolǵan kásip hám baǵdarlar, biznes reje islep shıǵıw tiykarları, startap joybarlardı jolǵa qoyıw hám qarjılandırıw imkaniyatları, jeńillikli kreditler hám mámleketlik baǵdarlamalar haqqında tolıq maǵlıwmatlar berildi.

NMPI baspasóz xızmeti.