Ájiniyaz atındaǵı Nókis mámleketlik pedagogikalıq institutı Tábiyiy pánler fakultetiniń student-jasları tiyisli juwapkerler hám professor-oqıtıwshılar menen birgelikte Aral teńiziniń qurıǵan ultanında ekologiyalıq teńsalmaqlılıqtı tiklewge baǵdarlanǵan ekoakciyaǵa belsene qatnastı.

Ekoakciya dawamında institut studentleri hám juwapkerler tárepinen teńizdiń qurıǵan ultanında shól klimatına shıdamlı seksewil hám basqa ósimlik nálleri otırǵızıldı.

– Bunday ósimlikler aymaqta qum kóshiwiniń aldın alıw, hawaǵa kóterilip atırǵan duz hám shań muǵdarın kemeytiw, sonday-aq, ekologiyalıq turaqlılıqtı támiyinlewde úlken áhmiyetke iye. Student-jaslarımız tábiyattı qorǵaw, qorshaǵan ortalıqqa juwapkershilik penen qatnasta bolıw boyınsha ózleriniń puqaralıq poziciyasın kórsetip, akciyada ayrıqsha belsendilik kórsetti, – deydi Tábiyiy pánler fakulteti dekanı Qarjawbay Reymov.

Atap ótiw orınlı, elimizde Aralboyı aymaǵındaǵı ekologiyalıq jaǵdaydı jaqsılaw boyınsha keń kólemli jumıslar ámelge asırılmaqta. Prezidentimizdiń baslaması menen Aral teńiziniń qurıǵan ultanında millionlaǵan gektarlıq maydanlarda seksewil hám basqa shólge shıdamlı ósimlikler egiw jumısları alıp barılmaqta. Bunday jumıslar nátiyjesinde aymaqta «jasıl qaplama»nı keńeytiw, qum hám duzlardıń kóteriliwiniń aldın alıw, sonday-aq, xalıqtıń salamatlıǵın qorǵawǵa baǵdarlanǵan áhmiyetli nátiyjelerge erisilmekte.

NMPI baspasóz xızmeti.