Húrmetli hám áziz apa-qarındaslar, ádiwli ustazlar, qádirli student-qızlar!

Sizlerdi báhárdiń eń gózzal áyyamı – 8-mart – Xalıqaralıq hayal-qızlar kúni menen shın júrekten qutlıqlayman.

Hayal-qızlar – ómirimizdiń mazmunı, shańaraqlarımızdıń mehiri hám jámiyetimizdiń bekkem súyenishi esaplanadı. Sizler óz mehir-muhabbatıńız, sabır-tózimińiz, pidayılıǵıńız, sonday-aq, bilim hám potencialıńız benen tek ǵana shańaraqlarda emes, sonıń menen birge, jámiyettiń rawajlanıwında da áhmiyetli orın iyeleysiz. Ásirese, bilimlendiriw tarawında jumıs alıp barıp atırǵan ustaz hayallarımız hám ilim jolında izlenip atırǵan student-qızlarımız elimizdiń jarqın keleshegi ushın múnásip úles qosıp kelmekte.

Búgingi kúnde elimizde hayal-qızlardıń huqıq hám máplerin qorǵaw, olardıń jámiyettegi ornın bunnan bılay da bekkemlew, bilim alıwı, ilim hám túrli tarawlarda óz potencialın kórsetiwi ushın keń imkaniyatlar jaratılmaqta. Institutımızda da student-qızlarımızdıń bilim alıwı, dóretiwshilik hám ilimiy potencialın rawajlandırıw, olardıń baslamaların qollap-quwatlaw baǵdarında nátiyjeli jumıslar ámelge asırılmaqta.

Pursattan paydalanıp, siz, áziz hayal-qızlarǵa bekkem densawlıq, baxıt, shańaraqlarıńızǵa amanlıq hám abadanlıq, juwapkershilikli hám maqtanıshlı jumıslarıńızda úlken tabıslar tileymen. Gózzal báhár bayramı kewillerińizdi quwanıshqa toltırıp, ómirińizge jańa arzıw-niyetler hám tabıslar alıp kelsin.

Jáne bir márte bársheńizdi 8-mart – Xalıqaralıq hayal-qızlar kúni menen shın júrekten qutlıqlayman!

Húrmet penen,

Alisher Ubbiyev,
Ájiniyaz atındaǵı Nókis mámleketlik pedagogikalıq institutınıń rektorı.