Ájiniyaz atındaǵı Nókis mámleketlik pedagogikalıq institutına xalıqaralıq birge islesiw baylanısların bunnan bılay da rawajlandırıw, bilimlendiriwdiń sapasın arttırıw hám student-jaslarǵa zamanagóy bilim hám kónlikpelerdi jetkeriw maqsetinde Qazaqstan Respublikası Shaxmardan Esenov atındaǵı Kaspiy texnologiyalar hám injiniring universitetiniń bir topar tájiriybeli professor-oqıtıwshılar keldi.

Olar arasında matematika páni boyınsha fundamental ilimler kafedrasınıń professorları Gúlash Qoshanova hám Bazargúl Quljaǵarova, fizika páni boyınsha usı kafedranıń professorı Lidiya Taymuratova, úlken oqıtıwshı Gúldana Qarabasova, informatika páni boyınsha kafedra docenti Raxat Shuwaqbaeva, sonıń menen birge, tariyx páni boyınsha tariyx hám dástúrli óner kafedrasınıń professorı Orıngúl Tabıldieva institut studentleri ushın qızıqlı hám mazmunlı sabaqlardı ótti.

Sabaqlar dawamında studentler tarawlar boyınsha zamanagóy ilimiy qatnaslar, aldınǵı pedagogikalıq metodlar hám xalıqaralıq tájiriybeler menen jaqınnan tanısıw imkaniyatına iye boldı. Sabaqlar ashıq sáwbetlesiw, soraw-juwap hám pikir almasıw formasında shólkemlestirilip, studentlerdiń bilimin ele de bekkemlewge xızmet etti.

Qazaqstanlı professorlardıń institutqa keliwi oqıw procesin jetilistiriw menen birge, eki joqarı oqıw ornı arasındaǵı ilimiy hám bilim beriw boyınsha birge islesiw baylanısların bunnan bılay da bekkemlewge de xızmet etti. Bunday birge islesiw professor-oqıtıwshılar hám studentler arasında tájiriybe almasıw, qospa ilimiy izertlewler júrgiziw, akademiyalıq mobillikti rawajlandırıw hám oqıw procesine innovaciyalıq qatnaslardı engiziwde úlken áhmiyetke iye.

Sonday-aq, professorlar menen ushırasıwlar dawamında aldaǵı waqıtta qospa ilimiy-ámeliy joybarlardı ámelge asırıw, seminar hám sheberlik sabaqların shólkemlestiriw, professor-oqıtıwshılar hám studentler almasıwın jolǵa qoyıw sıyaqlı máseleler de dodalandı. Bul bolsa eki joqarı oqıw ornı arasındaǵı birge islesiwdi jańa basqıshqa kóteriw ushın áhmiyetli tiykar jaratadı.

NMPI baspasóz xızmeti.