Ájiniyaz atındaǵı Nókis mámleketlik pedagogikalıq institutında Filologiya fakulteti qazaq, túrkmen tili hám ádebiyatı kafedrası shólkemlestiriwinde Qaraqalpaqstan Respublikası Qazaq milliy-mádeniy orayı menen birgelikte tuwısqan qazaq xalqınıń milliy bayramlarınıń biri bolǵan amal merekesi – kórisiw kúnine arnalǵan ádebiy-kompoziciyalıq bayram keshesi bolıp ótti.

Ulıstıń ullı kúni, jańa jıl, jańa kúnniń baslanıwı sıpatında belgilenetuǵın bul bayram qazaq xalqınıń ata-babalardan miyras bolıp kiyatırǵan qádiriyatlarınıń biri bolıp tabıladı.

Awızbirshilik hám tatıwlıqtıń tımsalı esaplanǵan bul bayram kóp milletli Qaraqalpaqstan Respublikasında da keń túrde belgileniwi dástúrge aylanǵan.

– Amal merekesi yamasa kórisiw – aǵayin-tuwısqanlar tatıwlıǵı, xalıqlardıń awızbirshiliginiń kórinisi. Óytkeni, bul dástúr aǵayinler arasındaǵı tatıwlıqtı bekkemlep, tabıstıradı. Adamlar bir-birine jaqsılıqlar tilep, alǵıslar aytıladı, – deydi instituttıń qazaq, túrkmen tili hám ádebiyatı kafedrasınıń baslıǵı, docent Írıstı Quttımuratova.

Keshede Filologiya fakulteti dekanı Gúlbáhár Begmuratova, Qaraqalpaqstan Respublikası Qazaq milliy-mádeniy orayı baslıǵı Asqar Úmbetaev sózge shıǵıp, oyanıw áyyyamı, Nawrız jarshısı bolǵan amal merekesi menen qutlıqladı, bul bayramnıń milletler aralıq tatıwlıqtı bekkemlewdegi áhmiyetine ayrıqsha toqtaldı.

Ilaj sheńberinde qazaq xalqınıń áwladtan-áwladqa ótip milliy taǵamları, milliy kiyimleri kórgizbesi shólkemlestirilip, talantlı studentler atqarıwındaǵı qosıq-jırlar, milliy ayaq-oyınlar, milliy dástúrler hám úrp-ádetler sáwlelengen saxnalıq kórinisler, soraw-juwaplar qatnasıwshılarǵa bayram keypiyatın inám etti.

NMPI baspasóz xızmeti.