Ájiniyaz atındaǵı Nókis mámleketlik pedagogikalıq institutında «Piyshembi – jaslar kúni» múnásibeti menen jaslardıń ilimiy-innovaciyalıq hám startap joybarların qollap-quwatlaw maqsetinde ushırasıw shólkemlestirildi.

Ushırasıwǵa Qaraqalpaqstan Respublikası Ministrler Keńesiniń Jasalma intellekt hám sanlı texnologiyalardı rawajlandırıw bóliminiń bas qánigesi Muzaffar Alimov, instituttıń ilimiy isler hám innovaciyalar boyınsha prorektorı wazıypasın atqarıwshısı Gúlbáhár Begmuratova, ziyrek studentlerdiń ilimiy-izertlew jumısların shólkemlestiriw bólimi baslıǵı Qahraman Tashanov, sonday-aq, startap joybarlar boyınsha ámeliy jumıslar alıp barıp atırǵan student-jaslar qatnastı.

Ilaj dawamında studentler tárepinen islep shıǵılıp atırǵan startap joybarlar tanıstırılıp, qánigeler qatnasıwında keń túrde dodalandı. Sonıń menen birge, jaslardıń innovaciyalıq ideyaları, zamanagóy texnologiyalardı ámeliyatqa engiziw baǵdarındaǵı usınısları tıńlandı. Qánigeler tárepinen olardı ele de jetilistiriw, ámeliy basqıshqa kóteriw hám investiciyalardı tartıw boyınsha usınıslar berildi.

NMPI baspasóz xızmeti.