Paytaxtımız Nókis qalasında Yaponiyanıń Yamagata universiteti, Qaraqalpaqstan Respublikası Ministrler Keńesi, Biznesti rawajlandırıw banki tárepinen isbilermenlik tarawındaǵı mentorlardı tayarlaw maqsetinde shólkemlestirilgen «YORI-I» baǵdarlamasınıń juwmaqlawshı basqıshı bolıp ótti.

Ózbekstan Respublikası Prezidentiniń tiyisli pármanı tiykarında shólkemlestirilgen baǵdarlamada Qaraqalpaqstan Respublikasınan ulıwma 50 jas kadr saylap alınǵan bolıp, áhmiyetlisi, olar arasında Ájiniyaz atındaǵı Nókis mámleketlik pedagogikalıq institutı Tábiyiy pánler fakulteti biologiya tálim baǵdarınıń 3-kurs studenti Kúmisay Qızılbaeva da 60 saatlıq kursta tabıslı juwmaqladı.

Juwmaqlawshı biznes-reje prezentaciyası hám pitkeriw máresiminde tıńlawshılar alǵan bilimleri tiykarında, sonday-aq, jergilikli sanaat mashqalaları hám bazar zárúrliklerin esapqa alǵan halda tayarlaǵan biznes ideyaların qánigelerge tanıstırdı.

Ilaj juwmaǵında institutımız studenti Kúmisay Qızılbaeva basshılıǵındaǵı «Agromarket» joybarı jeńimpaz dep tabıldı.

Sonday-aq, shólkemlestiriwshiler tárepinen oǵan xalıqaralıq dárejedegi mentorlıq sertifikatı tapsırıldı.