Ájiniyaz atındaǵı Nókis mámleketlik pedagogikalıq institutında student-jaslardıń intellektual potencialın rawajlandırıw, erkin pikirlew hám logikalıq analizlew kónlikpelerin bekkemlew maqsetinde shólkemlestirilgen «Debat» intellektual oyını boyınsha «Rektor kubogi» jarısınıń final basqıshı bolıp ótti.

Juwmaqlawshı oyında Tariyx fakultetiniń «Turan» hám Mektepke shekemgi hám baslawısh tálim fakultetiniń «Ziya qarlıǵashları» komandaları áhmiyetli máseleler boyınsha óz bilim hám potencialın sınaqtan ótkerdi.

Atap aytqanda, ekologiyalıq mashqalalar, qorshaǵan ortalıqtı qorǵaw, plastik hám polietilen paketlerden paydalanıw mádeniyatı sıyaqlı máseleler dıqqat orayında boldı.

Oyın dawamında komandalar tastıyıqlawshı hám biykarlawshı poziciyalarda debat alıp barıp, óz pikirlerin tiykarlı dáliller, anıq mısallar hám logikalıq analizler arqalı qorǵadı. Qatnasıwshılar mashqalanıń áhmiyetin ashıp beriw menen birge, onıń sheshimine baylanıslı usınıs hám baslamalardı alǵa qoydı.

Qızıqlı pikir-talaslar menen ótken oyın dawamında studentler sóylew mádeniyatı, jedel pikirlew hám komanda menen islesiw kónlikpelerin kórsete aldı.

Solay etip, final oyını juwmaǵında Tariyx fakultetiniń «Turan» komandası «Debat» intellektual oyını boyınsha «Rektor kubogi» jarısınıń jeńimpazı dep tabıldı.

2-orındı Mektepke shekemgi hám baslawısh tálim fakultetiniń «Ziya qarlıǵashları», al 3-orındı Filologiya fakultetiniń «Filologlar» komandaları iyeledi.

Jeńimpaz hám sıylı orınlardı iyelegen komandalar institut rektoratı tárepinen diplom jáne bahalı sawǵalar menen sıylıqlandı.

NMPI baspasóz xızmeti.