Búgin, 24-mart kúni Ájiniyaz atındaǵı Nókis mámleketlik pedagogikalıq institutında xalıqaralıq bilimlendiriw baǵdarlamaların keń en jaydırıw, jaslardı global akademiyalıq jámiyetshilikke tartıw hám Ózbekstannıń insan kapitalın bekkemlewge baǵdarlanǵan keń kólemli bilimlendiriw marafonı – «El-yurt umidi» qorı kúnleri sheńberinde ushırasıw bolıp ótti.

Ushırasıwǵa qordıń atqarıwshı direktorı Gulnoza Ismailova, Ózbekstan Respublikası Prezidenti janındaǵı Basqarıw nátiyjeliligi agentligi Qaraqalpaqstan Respublikası filialı baslıǵı Adilbek Reimbaev, institut rektorı wazıypasın waqıtsha atqarıwshısı Quvondiq Qodirov, mámleketlik uyımlar hám shólkemlerdiń xızmetkerleri qatnastı.

Ashıq sáwbetlesiw formatında ótken ushırasıwda juwapkerler qordıń jumısları, Ózbekstan Respublikası Prezidentiniń «Qábiletli qánigelerdiń sırt elde bilim alıwın qollap-quwatlaw, olarda kásiplik kónlikpelerdi rawajlandırıw hám xoshametlewge baylanıslı qosımsha ilajlar haqqında»ǵı pármanında belgilengen wazıypalar jáne mámleketlik xızmetkerler ushın jaratılıp atırǵan imkaniyatlar haqqında maǵlıwmat berdi.

Atap ótilgenindey, házirgi waqıtta qor tárepinen mámleketlik xızmetkerlerdiń sırt ellerdegi aldınǵı óndirislik jumıs orınlarındaǵı maqsetli stajirovkaların shólkemlestiriwge ayrıqsha dıqqat qaratılıp atırǵan bolıp, bul boyınsha Basqarıw nátiyjeliligi agentliginiń usınısı tiykarında, sonday-aq, birge islesiwshi sırt mámleketler menen ashıq tańlaw járiyalaw arqalı jumıslar shólkemlestirilmekte.

Ilaj dawamında qatnasıwshılar ózlerin qızıqtırǵan sorawlarǵa juwapkerlerden tolıq juwaplar aldı.

Bul baǵdardaǵı ushırasıwlar Nókis qalası menen birgelikte Kegeyli hám Beruniy rayonlarında da ótkeriliwi belgilengen.

NMPI baspasóz xızmeti.