Ájiniyaz atındaǵı Nókis mámleketlik pedagogikalıq institutında Nawrız ulıwma xalıqlıq bayramı múnásibeti menen ótkerilip atırǵan «Nawrızdı ulıǵlaw – insandı ulıǵlaw!» atamasındaǵı bayram seyilleri sheńberinde sport túrleri hám milliy oyınlar boyınsha fakultetler arasında jarıslar shólkemlestirildi.

Milliy gúres, tas kóteriw, qol gúresi, arqan tartısıw hám lángi tebiw boyınsha ótkerilgen jarıslarda qatnasıwshılar óz imkaniyatların sınaqtan ótkerdi.

– Ata-babalarımızdan miyras bolıp kiyatırǵan bul sport túrleri hám milliy oyınlar jaslarımızdıń fizikalıq hám ruwxıy jaqtan jetik bolıp kamalǵa keliwi ushın xızmet etedi. Bul arqalı biz sheber sportshı jaslardı anıqlawdı da maqset etkenbiz, – deydi dene tárbiya hám sport kafedrasınıń baslıǵı, professor Asqar Niyazov.

Jarıs juwmaǵında jeńimpazlar hám sıylı orın iyeleri anıqlanıp, institut rektoratı hám sport klubı tárepinen bahalı sawǵalar menen sıylıqlandı.

Institutta Nawrız bayramına arnalǵan ilajlar dawam etpekte.

NMPI baspasóz xızmeti.