Belgili ilimpaz hám metodist, filologiya ilimleriniń doktorı, Qaraqalpaqstan Respublikasına miyneti sińgen ilim ǵayratkeri, Ózbekstan hám Qaraqalpaqstan xalıq bilimlendiriw aǵlası, mehriban insan, pidayı ustaz Maqset Ayımbetov Qallıevich dúnyadan kóz jumdı.

Ayımbetov Maqset Qallıevich 1954-jılı 1-yanvarda Nókiste tuwıldı. 1977-jılı Tashkent mámleketlik universitetiniń Matematika fakultetin pitkergennen keyin Nókis mámleketlik universitetinde oqıtıwshı bolıp isledi. Sońınan Ájiniyaz atındaǵı Nókis mámleketlik pedagogikalıq institutına jumısqa ótti. Miynet jolı dawamında instituttıń baslawısh bilim beriw metodikası kafedrası hám qaraqalpaq tili kafedraların basqardı.

1987-jılı Ózbekstan Ilimler akademiyası Til hám ádebiyat institutında «Qaraqalpaq publicistikalıq tekstleriniń leksikası hám morfologiyasınıń lingvo-statistikalıq analizi» temasında kandidatlıq dissertaciyasın, 1994-jılı 4-dekabrde Ózbekstan Ilimler akademiyası X.Sulaymanov atındaǵı Qoljazbalar institutında «Túrkiy tilleriniń kvantativ-tipologiyalıq jaqınlıǵın anıqlawdaǵı mashqalalar hám metodlar» temasında doktorlıq dissertaciyasın tabıslı qorǵadı.

Jańa taraw boyınsha izlengen M.Ayımbetovtıń jumısları AQSH, Germaniya, Italiya, Rumıniyanıń belgili qánigeleriniń joqarı bahasın aldı.

Úlgili shańaraq basshısı, mehriban áke, perzentlerin, shákirtlerin watanǵa sadıq insanlar etip tárbiyalaǵan ádiwli ustaz, pedagog alım Ayımbetov Maqset Qallıevichtiń jarqın esteligi mudamı biziń yadımızda qaladı.

Marhumnıń shańaraq aǵzaları, jaqınları, barlıq shákirtlerine tereń qayǵırıw menen kewil aytamız.

Ájiniyaz atındaǵı Nókis mámleketlik pedagogikalıq institutı rektoratı, jámiyetlik shólkemleri, Filologiya fakulteti hám qaraqalpaq tili kafedrasınıń jámááti.