Usı jıldıń 23-28-mart kúnleri Túrkmenstan Respublikasınıń Ashxabad qalasında matematika boyınsha VI Open Mathematical Olympiad for University Students – OMOUS-2026 xalıqaralıq pán olimpiadası bolıp ótti.

Olimpiadaǵa Túrkmenstannıń jetekshi joqarı oqıw orınları menen birge Ózbekstan, Rossiya, Germaniya, Greciya, Iran, Vengriya, Niderlandiya, Tájikstan hám Birlesken Arab Ámirlikleri sıyaqlı mámleketlerden ulıwma 87 komanda qatnasıp, óz imkaniyatların sınaqtan ótkerdi.

Xalıqaralıq pán olimpiadasında Ájiniyaz atındaǵı Nókis mámleketlik pedagogikalıq institutı Anıq pánler fakulteti matematika kafedrasınıń oqıtıwshısı, PhD Aziz Hakimbaev basshılıǵındaǵı institut komandası da qatnasıp, joqarı nátiyjelerge eristi.

Atap aytqanda, matematika hám informatika tálim baǵdarınıń 4-kurs studentleri Bahram Allakuatov, Ismetulla Nawrızbaev, Umida Maxsutova, sonday-aq, matematika tálim baǵdarınıń 2-kurs studenti Sayıpbek Nuratdinov jekelik jarıslarda 3-orındı iyelep, hár biri qola medalın qolǵa kirgizdi.

Álbette, bul jetiskenlik institutta matematika boyınsha xalıqaralıq dárejede qolǵa kirgizilip atırǵan joqarı kórsetkishlerdiń biri boldı.

Maǵlıwmat ushın, OMOUS xalıqaralıq ashıq pán olimpiadası qábiletli studentlerdi anıqlaw, olardıń logikalıq hám analitikalıq pikirlewin rawajlandırıw, sonday-aq, matematika boyınsha xalıqaralıq kólemde birge islesiwdi kúsheytiw maqsetinde shólkemlestirildi.

NMPI baspasóz xızmeti.