Ájiniyaz atındaǵı Nókis mámleketlik pedagogikalıq institutında 2025-2026-oqıw jılı ushın respublikalıq joqarı oqıw orınlarınıń bakalavriat basqıshı studentleri arasında Ózbekstan Respublikası Prezidenti hám ataqlı mámleketlik stipendiyalarǵa múnásip dep tabılǵan studentler, sonday-aq, instituttıń Ájiniyaz Qosıbay ulı atındaǵı stipendiyası tańlawlarında jeńimpaz bolǵan magistrant, student hám oqıwshı-jaslarǵa gúwalıqlar tapsırıwǵa arnalǵan saltanatlı ilaj bolıp ótti.

Ilajda institut rektorı w.w.a. Quvondiq Qodirov sózge shıǵıp, mámleketlik stipendiyalar tańlawlarında, sonday-aq, ilimiy-izertlew jumıslarında úlken nátiyjelerge erisip atırǵan jaslardı qutlıqlap, olardıń oqıwı hám ilimiy jumıslarında tabıslar tiledi.

Sońǵı jıllarda respublikamızda ilimiy hám innovaciyalıq jumıslardı qollap-quwatlaw, kadrlar tayarlaw sistemasın reformalaw boyınsha ámeliy jumıslar alıp barılmaqta.

Ásirese, jaslardıń dóretiwshilik, intellektual potencialın júzege shıǵarıw, innovaciyalıq ideyalar, joybarlar hám texnologiyalardı óndiriske engiziw, qábiletli studentler, jas ilimpazlardıń innovaciyalıq jumısların xoshametlew, ilim, bilimlendiriw hám óndiristiń integraciyasın kúsheytiw ushın zárúr sharayatlar jaratılmaqta. Usınday imkaniyatlardan nátiyjeli paydalanıp atırǵan jaslar arasınan respublikalıq hám xalıqaralıq pán olimpiadaları, mámleketlik stipendiyalar tańlawlarınıń jeńimpazları jetisip shıqpaqta.

Atap aytqanda, bıyılǵı oqıw jılında instituttıń 15 studenti Ózbekstan Respublikası Prezidenti hám ataqlı mámleketlik stipendiyalar tańlawlarınıń, sonday-aq, magistrant, student hám oqıwshılardan ulıwma 9 jas instituttıń Ájiniyaz Qosıbay ulı atındaǵı stipendiya tańlawı jeńimpazı bolıp, stipendiat atandı.

Ilajda stipendiat jaslarǵa gúwalıqlar tapsırıldı.

«Tumaris» xalıq ansambli hám muzıkalıq tálim baǵdarınıń talantlı studentleri atqarıwındaǵı koncert baǵdarlaması ilaj qatnasıwshılarına joqarı keypiyat inám etti.

NMPI baspasóz xızmeti.