Ájiniyaz atındaǵı Nókis mámleketlik pedagogikalıq institutında student-jaslar arasında salamat turmıs tárizin keń úgit-násiyatlaw, olardıń sportqa bolǵan qızıǵıwshılıǵın arttırıw hám sheber sportshılardı anıqlaw maqsetinde «Jańa Ózbekstan studentleri olimpiadası» sport jarıslarınıń institut basqıshına start berildi.

Ilajda institut rektorı w.w.a. Quvondiq Qodirov sózge shıǵıp, jaslardı jetik insan etip tárbiyalawda sporttıń áhmiyeti haqqında aytıp ótti hám barlıq qatnasıwshılarǵa áwmet tiledi.

Jarıslar kóterińki ruwxta shólkemlestirilip, onda studentler sporttıń voleybol, gandbol, basketbol 3×3, stol tennisi, futbol, jeńil atletika hám júziw sıyaqlı 7 túri boyınsha óz ara bellesedi. Jarıslarǵa bakalavriattıń kúndizgi tálim baǵdarlarında oqıp atırǵan, sportqa qızıǵıwshılıǵı hám belgilengen tayarlıqlarǵa iye bolǵan student-jaslar belsene qatnaspaqta.

Bul olimpiadanıń institut basqıshı student-jaslardıń fizikalıq belsendiligin arttırıw, salamat turmıs tárizin kúndelikli turmısqa engiziw, komanda bolıp islew, sabırlılıq hám básekige shıdamlılıq sıyaqlı ózgesheliklerdi qáliplestiriwde úlken áhmiyetke iye. Sonıń menen birge, bul jarıslar arqalı qábiletli, sheber hám úmitli sportshılar saylap alınıp, kelesi aymaqlıq hám respublikalıq basqıshlarda qatnasıw imkaniyatına iye boladı.

Atap ótiw orınlı, «Jańa Ózbekstan studentleri olimpiadası» tek ǵana sport jarısları bolıp qalmastan, sonıń menen birge, jaslar arasında salamat báseki ortalıǵın qáliplestiriw, olardı zıyanlı illetler hám ádetlerden saqlaw, bos waqtın mazmunlı shólkemlestiriwge xızmet etetuǵın áhmiyetli baslamalardıń biri bolıp tabıladı.

Institutta jarıslar joqarı dárejede dawam etpekte hám student-jaslar óz sheberligi, fizikalıq tayarlıǵı jáne jeńimpazlıqqa bolǵan umtılısların kórsetpekte.

NMPI baspasóz xızmeti.