Ájiniyaz atındaǵı Nókis mámleketlik pedagogikalıq institutı súwretlew óneri hám injenerlik grafikası tálim baǵdarınıń 3-kurs studenti Gúlnur Sársenova Kamoliddin Behzod atındaǵı mámleketlik stipendiyasınıń jeńimpazı boldı.

Ózbekstan Kórkem óner akademiyasınıń xabar beriwinshe, stipendiya tańlawına Ózbekstandaǵı joqarı oqıw orınlarınan ulıwma 39 studenttiń hújjetleri kelip túsken bolıp, ekspertler toparınıń tiyisli qararı menen olar arasınan 7 studentke mámleketlik stipendiya tańlawınıń jeńimpazlıǵı nesip etti.

Olar arasında NMPI studenti Gúlnur Sársenova kórkem ónertanıw hám muzeytanıw baǵdarı boyınsha Kamoliddin Behzod atındaǵı mámleketlik stipendiyasınıń jeńimpazı dep tabıldı. G.Sársenova respublikalıq hám xalıqaralıq tańlawlar, kórgizbeler, ilimiy konferenciyalarda turaqlı qatnasıp, joqarı nátiyjelerdi qolǵa kirgizip kelmekte. Atap aytqanda, institut tárepinen shólkemlestirilgen «Innovation in teaching foreign languages: problems and perspectives» atamasındaǵı Oraylıq Aziya konferenciyası hám basqa da ilimiy ilajlarda óz maqalaları, sonday-aq, Rossiya Federaciyasınıń «Интернаука» xalıqaralıq jurnalında «Одежда каракалпакских женщин» atamasındaǵı maqalası menen qatnasıp, sertifikatlar menen sıylıqlandı.

Jeńimpazlarǵa «Kamoliddin Behzod atındaǵı mámleketlik stipendiyasınıń iyesi» gúwalıǵı Ózbekstan Kórkem óner akademiyası tárepinen usı jıldıń 20-avgust kúnine shekem saltanatlı túrde tapsırıladı.

Mámleketlik stipendiyası 1-sentyabrden baslap bir oqıw jılı dawamında belgilengen muǵdarda tólenedi.

Maǵlıwmat ornında atap ótiw kerek, Kamoliddin Behzod atındaǵı mámleketlik stipendiyası Ózbekstan Respublikası Prezidentiniń 2020-jıl 21-apreldegi «Súwretlew hám ámeliy kórkem óner tarawı nátiyjeliligin arttırıwǵa baylanıslı qosımsha ilajlar haqqında»ǵı qararına muwapıq, ÓzR Ministrler Kabinetiniń 2020-jıl 6-noyabrdegi qararı tiykarında shólkemlestirilgen bolıp, joqarı oqıw orınlarında súwretlew hám ámeliy kórkem óner jáne dizayn baǵdarında oqıp atırǵan studentler ushın beriledi.

Islam Matekov,
NMPI baspasóz xatkeri.