24-oktyabr kúni bolıp ótetuǵın Ózbekstan Respublikası Prezidenti saylawı boyınsha siyasiy partiyalar tárepinen usınılǵan hár bir talabannıń saylaw aldı baǵdarlamaları boyınsha tolıq maǵlıwmatlar beriw maqsetinde baslawısh tálim fakultetinde ushırasıw bolıp ótti.

Ushırasıwda baslawısh tálim fakulteti dekanı, xalıq deputatları Nókis qalalıq Keńesi deputatı U.Seytjanova hám milliy ideya, ruwxıylıq tiykarları hám huqıq tálimi kafedrasınıń aǵa oqıtıwshısı, 56-saylaw uchaskası baslıǵınıń orınbasarı Asqar Abatovlar student jaslarǵa tolıq maǵlıwmatlar berdi.

Usı jıldıń 24-oktyabr kúni bolıp ótetuǵın Ózbekstan Respublikası Prezidenti saylawına da sanawlı kúnler qaldı. Saylaw — bul puqaralardıń konstituciyada belgilengen tiykarǵı huqıqı bolıp tabıladı. Saylaw kúni on segiz jasqa tolǵan hár bir Ózbekstan Respublikası puqaraları saylaw huqıqına iye.

Saylawshılarǵa Saylaw kodeksi hám Oraylıq saylaw komissiyasınıń 2021-jıl 25-avgust kúngi qararı menen tastıyıqlanǵan «Ózbekstan Respublikası Prezidenti saylawın ótkeriwde koronavirus infekciyası tarqalıwınıń aldın alıw boyınsha Instrukciya»da belgilengen qaǵıydalar esletip ótildi.

Dawıs beriw 24-oktyabr kúni saat 8:00 den 20:00 ge shekem ótkeriledi. Dawıs beriw waqtı hám ornı haqqında uchastkalıq saylaw komissiyası saylawshılardı saylawdan keminde on kún aldın xabardar etedi.

Saylawshı dawıs beriw imaratına kelgende onıń dene temperaturası ólshenedi hám qolına antiseptikalıq suyıqlıq sebiledi, qorǵanıw nıqabı bolmaǵan saylawshıǵa nıqap beriledi hám ol imaratqa kirgiziledi.

Saylawshı sociallıq aralıqtı saqlaǵan halda óziniń shaxsın tastıyıqlawshı hújjettiń tiyisli betin ashadı hám uchastkalıq saylaw komissiyasınıń usı hújjet penen kontaktsız tanısıwına imkaniyat jaratadı hám saylawshılar dizimine imza qoyadı. Sonnan ke­yin oǵan saylaw byulleteni beriledi.

Qanday da bir sebepke kóre saylawshılar dizimine familiyası kirmey qalǵan saylawshılardıń familiyaları saylawshınıń shaxsı, puqaralıǵı hám jasaw ornın tastıyıqlawshı hújjet tiykarında saylawshılar dizimi qosımshasına kirgiziledi.

Saylawshı saylaw byulletenin alǵannan keyin onı jasırın dawıs beriw kabinasında yaki bólmesinde toltıradı. Saylaw byulletenin toltırıw waqtında dawıs beriwshi shaxstan basqa shaxslardıń qatnasıwı qadaǵan etiledi.

Saylaw byulletenin óz betinshe toltırıw imkaniyatına iye bolmaǵan saylawshı óz qálewi menen jasırın dawıs beriw kabinasına yaki bólmesine basqa shaxstı shaqırıwǵa haqılı, buǵan saylaw komissiyası quramına kiretuǵın shaxslar, baqlawshılar hám ǵalaba xabar qurallarınıń wákilleri kirmeydi. Saylawshı ózi jaqlap dawıs berip atırǵan talabannıń familiyası tusına, oń tárepte jaylasqan bos kvadratqa «+» yaki «v» yamasa «x» belgisin qoyadı.

Dawıs beriwshi toltırılǵan saylaw byulletenin saylaw qutısına taslaydı. Eger de byulleten buzıp qoyılsa saylaw byulleteni saylawshınıń ótinishi boyınsha jańası menen almastırılıwı múmkin.