Usı jıldıń 3-8-noyabr kúnleri aralıǵında Tashkent qalasında Ózbekstan Milliy universiteti stadionında Ózbekstan Respublikası studentler sport associaciyası tárepinen sporttıń regbi-7 túri boyınsha joqarı oqıw orınları studentleri arasında «Studentler ligası» jarısı ótkerilip atırǵan bolıp, búgingi kúnge shekem qızlar saylandı komandaları arasındaǵı jarıslar óz juwmaǵına jetti.

Quwanıshlısı, jarısta Ájiniyaz atındaǵı Nókis mámleketlik pedagogikalıq institutınıń qızlar saylandı komandası barlıq qarsılas komandalardı jeńip shıǵıp, 1-orındı qolǵa kirgizdi hám «Studentler ligası» sport jarısınıń jeńimpazı boldı.

Finalǵa shekemgi jarıslarda Ándijan mámleketlik universiteti, Ózbekstan mámleketlik dene tárbiya hám sport universiteti, Ferǵana mámleketlik universiteti hám Qaraqalpaq mámleketlik universiteti komandaların jeńip shıqqan NMPI qızlar saylandı komandası finalda ekinshi márte Ózbekstan mámleketlik dene tárbiya hám sport universiteti komandası ústinen 24:12 esabında jeńiske eristi.

Erkekler arasında jarıslar erteńnen baslanıwı belgilengen bolıp, onda instituttıń erkekler saylandı komandası da qatnasadı.

Jarısqa studentlerdi tájiriybeli trener-oqıtıwshı Polat Mamutov tayarladı.

Studentlerimizge jarısta áwmet tileymiz!

NMPI baspasóz xızmeti.