Mektepke shekemgi tárbiya hám defektologiya kafedrası óz aldına kafedra sıpatında 2019-jılı shólkemlestirildi. Usı waqıt aralıǵında joqarı mamanlıqqa iye defektolog-logoped kadrlardı tayarlaw maqsetinde Ózbekstan hám shet el joqarı oqıw orınları menen tıǵız baylanısta jumıslar alıp barılmaqta. Kafedra tárepinen 2021-jılı shólkemlestirilgen xalıqaralıq konferenciyaǵa Rossiya, Qazaqstan joqarı oqıw orınları defektologiya tarawı qánigeleri belsene qatnastı. Solardan Kuban mámleketlik universiteti jámááti de defektologiya, mektepke shekemgi tálimge tiyisli bayanatları menen qatnasqan edi. Usı jumıslar ele de dawam ettirilip 2021-2022-oqıw jılınan baslap kafedrada Kuban mámleketlik universiteti docenti Solenova Regina Ilinichna studentlerge onlayn tárizde tálim berip kelmekte.

Solenova Regina Ilinichna 1995-jıldan berli Kuban mámleketlik universitetinde isleydi. Kóplegen ilimiy miynetlerdiń, bir neshe ilimiy kitaplardıń avtorı. Házirgi waqıtta R.I.Solenova Kuban mámleketlik universitetiniń mektepke shekemgi pedagogika-psixologiya kafedrası baslıǵı lawazımında islep atır.

Studentlerimiz R.I.Solenovanıń sabaqlarına qızıǵıwshılıq penen qatnasıp kelmekte. Hár bir sabaqta slaydlar hám  oqıtıwdıń interaktiv metodlarınan paydalanadı, studentlerdiń ózlestiriw dárejesin anıqlap baradı hám oqıtıw procesiniń nátiyjeli ótiwine erisedi. Mámleketimiz rawajlanıwı ushın joqarı mamanlıqqa iye, básekige shıdamlı kadrlar tayarlawda bunday jumıslar ele dawam etedi.