Ózbekstan Respublikası Prezidenti Shavkat Mirziyoev basshılıǵında ótkerilgen májiliste mámleketimiz boylap «Jasıl mákan» ulıwma milliy joybarın ámelge asırıw ilajları kórip shıǵılıp, usı jıldıń 10-dekabr kúnine shekem terek egiw boyınsha «áhmiyetli 40 kúnlik» járiyalanǵan edi.

Ájiniyaz atındaǵı Nókis mámleketlik pedagogikalıq institutı jámááti hám student jasları usı wazıypalardan kelip shıǵıp 2-noyabr kúninen baslap institut átirapı, sonday-aq, paytaxtımız Nókis qalasındaǵı «Doslıq» kanalı boyındaǵı bos jerlerge hár qıylı dekorativ, miywe hám sayalı terek nállerin otırǵızıw, jerlerdi jabayı shóplerden tazalaw, abadanlastırıw hám kógallandırıw sıyaqlı jumıslardı atqarıp kelmekte.

– Búgin institutta shólkemlestirilgen Studentler keńesi aǵzalarınıń baslaması menen institut átirapına ekologiya komiteti tárepinen usınıs etilgen katalpa, pavlovniya, yapon saforası, qaraǵash, tut hám akaciya sıyaqlı terek nállerin otırǵızdıq, – deydi NMPI jaslar jetekshisi Bayram Gúlimbetov. – «Áhmiyetli 40 kúnlik» dawamında belgilengen jerlerge 20 mıń túpten aslam terek nállerin otırǵızıwdı maqset etkenbiz.

Sonday-aq, ulıwma milliy joybarı sheńberinde dawam etip atırǵan ilajlar barlıq fakultetler kóleminde hár kúni ámelge asırılıp atırǵan bolıp, institut jámááti hám studentleri ana tábiyatımızdıń gúllep-jasnawı, qorshaǵan ortalıqtıń abadanlasıwına múnásip úleslerin qospaqta.

Islam Matekov,
NMPI baspasóz xatkeri.
Avtordıń túsirgen fotoları.