Usı jıldıń basında Ózbekstan Respublikası Oliy Majlisi Senatı hám Nızamshılıq palatasınıń organı «Халқ сўзи» hám «Народное слово» gazetalarınıń redakciyası tárepinen «Eń jaqsı maqalalar» tańlawı járiyalanǵan edi. Ótken waqıt dawamında tańlawǵa eliwden aslam maqalalar qabıl etildi.

Tóreshiler quramı tárepinen usı gazetalardıń betlerinde házirgi waqıtqa shekem járiyalanǵan dóretiwshilik jumıslar kórip shıǵılıp, olardıń arasınan elimizde alıp barılıp atırǵan jedel reformalar kólemi analitikalıq, qızıqlı, tásirli hám ápiwayı túsinikli tilde sáwlelendirilgen eń jaqsı maqalalar saylap alındı.

Redakciyada 8-dekabr – Ózbekstan Respublikası Konstituciyası qabıl etilgeniniń 29 jıllıǵı qarsańında usı tańlaw jeńimpazların sıylıqlaw máresimi bolıp ótti.

Ilajda «Халқ сўзи» hám «Народное слово» gazetaları menen turaqlı birge islesip, áhmiyetli tematikalardaǵı analitikalıq-sın maqalaları menen belsene qatnasıp, jeńimpazlıqtı qolǵa kirgizgenler múnásip xoshametlendi.

Quwanıshlısı, tańlaw jeńimpazları dep tabılǵan 12 avtor qatarında Ájiniyaz atındaǵı Nókis mámleketlik pedagogikalıq institutınıń rektorı, fizika-matematika ilimleriniń doktorı Bayram Otemuratov «Ta’lim va ilm-fan rivoji Uchinchi Renessans poydevorini yaratishda muhim oʻrin tutadi» atamasındaǵı maqalası menen diplom, estelik sawǵaları menen sıylıqlandı.

Maqalanı PDF formatında oqıw ushın gazetanıń elektron versiyasın júklep alıń.

NMPI baspasóz xızmeti.