2021-2022-oqıw jılınıń báhárgi semestrinde keshirimli sebeplerge baylanıslı oqıwın kóshiriw haqqındaǵı arzalardı qabıllaw boyınsha aymaqlıq jumısshı toparlardıń jumısları jolǵa qoyıldı. Bul haqqında Joqarı hám orta arnawlı bilimlendiriw ministrligi xabar berdi.

Aymaqlıq jumısshı toparlar 2022-jıldıń 20-yanvar kúnine shekem (sol kúni de) saat 09:00 den 17:00 ge shekem (ekshembi hám bayram múnásibeti menen belgilengen sáneler – dem alıs kúni, shembi kúni – saat 09:00 den 15:00 ge shekem) jumıs alıp baradı.

Belgilengen rejege muwapıq, puqaralar báhárgi semestrde tómendegi keshirimli sebeplerge baylanıslı aymaqlıq jumısshı toparlarǵa arza tapsırıwı múmkin.

2021-2022-oqıw jılı dawamında:

– respublikanıń bir aymaǵınan ekinshi aymaǵına turaqlı jasaw ushın yamasa turmısqa shıǵıwına baylanıslı ómirlik jolası turaqlı jasaytuǵın (turaqlı dizimge alınǵan) aymaqqa kóship ótkende;

– ómirlik joldası yamasa ata-anası áskeriy xızmetti atqarıw ornın ózgertkende;

– ata-anası (ómirlik jolası) sırt eldegi mámleketlik xızmetinen qaytqanda.

Usı sebeplerden basqa jaǵdaylarda puqaralar oqıwın kóshiriw boyınsha ulıwmalıq tártipte hár jılı 15-iyuldan 5-avgustqa shekem arza menen múrájat etiwi múmkin.

Oqıwın qayta tiklew boyınsha (kóshirip tiklew buǵan kirmeydi) arzalar studenttiń shetletilgenine neshe jıl bolǵanına qaramastan tikkeley tiyisli joqarı oqıw ornına tapsırıladı.

Oqıwın kóshiriw haqqındaǵı arzaları qabıllaw boyınsha Qaraqalpaqstan Respublikasındaǵı joqarı oqıw orınları ushın aymaqlıq jumısshı topar Berdaq atındaǵı Qaraqalpaq mámleketlik universitetinde shólkemlestirilgen bolıp, jumısshı toparǵa +99861 223-59-52, +99861 223-58-31 telefon nomerleri arqalı múrájat etiw arqalı qosımsha maǵlıwmatlarǵa iye bolıwıńız múmkin.

Islam Matekov.