Búgingi ótkerilip atırǵan videoselektor májilisinde Prezident Shavkat Mirziyoyev tómendegilerdi málim etti:

2022—2026-jıllarǵa mólsherlengen Hayal-qızlar bilimlendiriwin qollap-quwatlaw baǵdarlaması qabıl etiledi.

Baǵdarlama sheńberinde paytaxtta tiykarınan hayal-qızlardı oqıtıw ushın mámleketlik-jeke menshik sheriklik tiykarında toqımashılıq tarawında óz aldına universitet shólkemlestiriledi. Orınlarda onıń texnikumları da ashıladı.

Sonday-aq, házirgi waqıtta hayal-qızlardıń úlesi tómen bolǵan anıq pánler, texnika hám huqıqtanıw baǵdarlarındaǵı JOOlarda hayal-qızlardan ibarat studentler úlesin házirgi 24 procentten 40 procentke shekem jetkeriledi.

Bunıń ushın hár jılı hayal-qızlardıń student bolıwına kvotanıń keminde 50 procenti anıq pánler, texnika hám huqıqtanıw baǵdarları ushın maqsetli ajıratıladı.

Jańa oqıw jılınan baslap JOO, texnikum hám kolledjlerde oqıp atırǵan qızlarǵa tálim kontraktların tólew ushın, birinshi márte, 7 jıllıq múddetke procentsiz kredit beriw engiziledi.

«Bunday imkaniyat ele biziń tariyxımızda ulıwma bolmaǵan», – dedi Prezident.

Sonıń menen birge, Shavkat Mirziyoyev bularǵa qosımsha tómendegi imkaniyatlar jaratılatuǵınlıǵın atap ótti:

Jańa oqıw jılınan baslap magistraturada oqıp atırǵan qızlardıń kontrakt pulları tolıq byudjetten qaplap beriledi (23 mıń qızǵa 200 milliard sum);

– hár jılı 50 qız abıroylı sırt el JOOlarına bakalavr hám 10 qız magistraturaǵa oqıwǵa jiberiledi;

– hár bir wálayatta járdemge mútáj shańaraq wákilleri, ata yamasa anasınan ayrılǵan 150 qızdıń (ulıwma 2,1 mıń adam) tálim kontraktı jergilikli byudjetten qaplap beriledi;

– jas perzenti bolǵan student-qızlarǵa aralıqtan oqıwǵa sharayat jaratıladı;

– doktorantura baǵdarında hayal-qızlar ushın hár jılı keminde 300 den maqsetli kvota ajıratıladı.

Islam Matekov,
Qaraqalpaqstan xabar agentligi.