Xabarıńız bar, Ózbekstan Respublikası Joqarı hám orta arnawlı bilimlendiriw ministrliginiń 2021-2022-oqıw jılı ushın respublikalıq joqarı oqıw orınlarınıń bakalavriat basqıshı studentlerine Ózbekstan Respublikası Prezidenti hám ataqlı mámleketlik stipendiyaların tayınlaw haqqındaǵı buyrıǵı tiykarında tiykarında Ájiniyaz atındaǵı Nókis mámleketlik pedagogikalıq institutınıń 9 studenti Ózbekstan Respublikası Prezidenti mámleketlik stipendiyası, Nawayı, Islam Kárimov, Ibrayım Yusupov hám Tólepbergen Qayıpbergenov atındaǵı mámleketlik stipendiyalarınıń jeńimpazları dep tabılǵan edi.

Sonıń menen birge, 2021-2022-oqıw jılı basında instituttıń Súwretlew óneri hám injenerlik grafikası tálim baǵdarınıń 3-kurs studenti Gúlnur Sársenova Kamoliddin Behzod atındaǵı mámleketlik stipendiyasınıń jeńimpazı boldı.

Mart ayınıń basında hámmemizdi quwanıshqa bólegen waqıya – Ózbekstan Respublikası Prezidentiniń qararına muwapıq, instituttıń Pedagogika fakulteti muzıkalıq tálim baǵdarınıń 4-kurs studenti Erkinay Orınbaeva Zulfiya atındaǵı Mámleketlik sıylıqtıń laureatı bolǵan edi.

Ózbekstandaǵı barlıq joqarı oqıw orınları studentleri arasında ótkerilgen «JÍL STUDENTI-2021» respublikalıq tańlawınıń «JÍLDÍŃ EŃ BILIMLI STUDENTI (óz qánigeligi boyınsha)» nominaciyası boyınsha Ájiniyaz atındaǵı Nókis mámleketlik pedagogikalıq institutı Tábiyǵıy pánler fakultetiniń studenti Gúlbanu Almenova sıylı 2-orın jeńimpazı boldı.

Sonday-aq, 2021-2022-oqıw jılında institut kóleminde ulıwma 4 student Ájiniyaz Qosıbay ulı atındaǵı, jáne 3 student Ibrayım Yusupov atındaǵı stipendiyalar tańlawlarında jeńimpaz dep tabıldı.

Búgin, 25-mart kúni institutta usınday joqarı nátiyjelerdi qolǵa kirgizgen student-jaslardı sıylıqlaw ilajı bolıp ótti.

Ilajda institut rektorı Bayrambay Otemuratov stipendiat hám laureat bolǵan jaslardı qutlıqlap, aldaǵı oqıw hám ilimiy-izertlew jumıslarında tabıslar tiledi.

Student-jaslarǵa institut rektoratı tárepinen tayarlanǵan sawǵalar hám stipendiyalar tańlawları jeńimpazı ekenligin tastıyıqlawshı gúwalıqlar tapsırıldı.

Sonıń menen birge, ilajda mámleketlik stipendiyalar tańlawlarına belsene qatnasqan studentlerge sertifikatlar hám sıylıqlar berildi.

NMPI baspasóz xızmeti.