Usı jıldıń 1-aprel kúni Ájiniyaz atındaǵı Nókis mámleketlik pedagogikalıq institutında student-jaslardıń bántligin támiyinlew maqsetinde bos jumıs orınları miynet yarmarkası bolıp ótti.

Xabarıńız bar, usı jıldıń 4-mart kúni Ózbekstan Respublikası Prezidenti Shavkat Mirziyoyev basshılıǵında ótkerilgen videoselektor jıynalısında joqarı oqıw orınları studentleriniń bántligin támiyinlew arqalı olardıń turmıs dárejesin jaqsılaw máselesi kórip shıǵılıp, juwapkerlerge tiyisli tapsırmalar berilgen edi.

Házirgi waqıtta Nókis mámleketlik pedagogikalıq institutında ulıwma 16 mıń 698 student oqıp atırǵan bolıp, sonnan 9 mıń 58 student bakalavriattıń kúndizgi, 5 mıń 928 student sırtqı, 258 student keshki bilimlendiriw formasında, 440 student ekinshi qánigelik boyınsha, al 1 mıń 14 student magistratura basqıshında bilim almaqta.

Mámleketimiz basshısı tárepinen belgilep berilgen wazıypalardan kelip shıǵıp, institut studentleri arasında jumıs islep, qosımsha dáramat tabıw niyetinde bolǵan studentlerdiń dizimi, olardıń jumıs islew imkaniyatları úyrenip shıǵılıp, usı tiykarda miynet yarmarkasına jumıs beriwshiler mirát etildi.

Miynet yarmarkasında tiykarǵı jumıs beriwshiler esaplanǵan Qaraqalpaqstan Respublikası Xalıq bilimlendiriw hám Mektepke shekemgi bilimlendiriw ministrlikleri sistemasındaǵı basqarma hám bólimler menen birgelikte 50 den aslam isbilermenlik subektleri, mámleketlik hám mámleketlik emes mákeme, kárxana hám shólkemlerdiń wákilleri bos jumıs orınları menen qatnastı.

– Miynet yarmarkasında birinshi gezekte sociallıq qorǵawǵa mútáj, jetim, mayıplıǵı bolǵan, «temir dápter», «hayallar dápteri»ne kirgen sociallıq jaqtan qollap-quwatlanıwı zárúr shańaraqlardıń perzentleri esaplanǵan 700 ge shamalas studentlerdiń bántligin támiyinlew, sonday-aq, jumıs islep, qosımsha dáramat tabıw niyetindegi jaslarımızǵa imkaniyatlar jaratıw tiykarǵı maqsetlerimizdiń biri bolıp tabıladı, – deydi instituttıń Jaslar máseleleri hám ruwxıy-aǵartıwshılıq isleri boyınsha prorektorı Q.Qodirov.

Atap ótiw kerek, institutta hám oqıp, hám jumıs isleytuǵın studentler, sonıń menen birge, jumıs islew niyetinde bolǵan jaslarǵa sharayatlar jaratıw, olardı hár tárepleme qollap-quwatlaw maqsetinde kovorking orayı jumıs alıp barmaqta.

Instituttıń marketing hám studentler ámeliyatı bóliminiń baslıǵı P.Xojaniyazovtıń málim etiwinshe, búgingi kúnde institut kóleminde oqıw menen birge jumıs penen bánt bolǵan 400 den aslam studentler bolıp, olar ushın bul jerde zamanagóy kompyuterler, biypul internet tarmaǵı hám basqa da imkaniyatlar jaratılǵan. Sonıń menen birge, studentlerge miynet nızamshılıǵı boyınsha túsinik jumısların alıp barıw, huqıqıy másláhátler beriw jolǵa qoyılǵan.

Bıyılǵı oqıw jılında Nókis mámleketlik pedagogikalıq institutın ulıwma 2101 pitkeriwshi, sonnan bakalavriat tálim baǵdarları boyınsha 1744, magistratura qánigelikleri boyınsha 357 student pitkeriwi kútilmekte. Miynet yarmarkasında 1-2-3-kurs studentleri menen birge usı pitkeriwshilerdiń de bántligin támiyinlew, olarǵa tiyisli tarawlar boyınsha jumıs orınlarına jollamalar beriw, jumıs beriwshiler menen shártnamalar dúziw jumısları alıp barıldı.

– Instituttıń Shet tilleri fakulteti rus tili hám ádebiyatı tálim baǵdarınıń 2-kursında oqıyman. Búgingi ótkerilgen miynet yarmarkasında Nókis rayonındaǵı 5-sanlı mektepke shekemgi bilimlendiriw shólkemine rus tili páni boyınsha balalarǵa bilim beriw ushın jumısqa ornalastım. Biz, jaslarǵa qaratılıp atırǵan itibardan, qollap-quwatlawlardan minnetdarmız, – deydi institut studenti Dilfuza Ábdiraxmanova.

Ilajǵa Qaraqalpaqstan Respublikası Bántlik hám miynet qatnasıqları, Xalıq hám Mektepke shekemgi bilimlendiriw ministrliklerinen, sonday-aq, bir qatar mámleketlik basqarıw uyımlarınan tiyisli juwapkerler qatnastı.

Islam Matekov,
NMPI baspasóz xatkeri.
Avtordıń túsirgen fotoları.