Búgin Prezident Shavkat Mirziyoyev qatnasıwında xalıq bilimlendiriw sisteması tarawında ámelge asırılıp atırǵan reformalardıń nátiyjeliligi, jıl basında belgilengen tapsırmalardıń orınlanıwı, jıl juwmaǵına shekem ámelge asırılatuǵın baslı wazıypalarǵa arnalǵan jıynalıs bolıp ótpekte.

Jıynalısta Shavkat Mirziyoyev tarawdaǵı jumıslardıń awhalın qanaatlandırarsız dep bahalap, bunıń ushın wálayat hám rayon hákimlerin keskin sınǵa aldı.

Atap aytqanda, eki ayda Ózbekstan boylap ótkerilgen úyreniwler nátiyjesinde respublikadaǵı 852 mektepte bilimlendiriw sapası, muǵallimlerdiń potencialı hám oqıwshılardıń joqarı oqıw orınlarına kiriw dárejesi birqansha tómen ekenligi anıqlanǵan.

Bul baǵdardaǵı eń awır awhal Qashqadárya, Surxandárya, Tashkent wálayatı hám Qaraqalpaqstanda ekenligi atap ótildi.

Jıynalısta Ózbekstan kóleminde 1 mıń 526 mektep balalar tárbiyası, oqıwǵa qatnas, ruwxıy ortalıq boyınsha «qızıl» kategoriyaǵa kirgizilgenligi málim etilip, ásirese, Tashkent qalasındaǵı 69 mektep, Surxandáryada 169, Qaraqalpaqstanda 128, Sırdáryada 54, Ferǵanada 162, Tashkent wálayatındaǵı 147 mekteptegi ortalıq qanaatlandırarsız dep tabılǵan.

Prezident tarawda aldaǵı waqıtları ámelge asırılatuǵın wazıypalardı belgilep berip, eń aldı menen, mektep muǵallimlerin jańa metodika tiykarında qayta tayarlaw boyınsha ulıwma milliy joybar baslanatuǵınlıǵın málim etti.

«Usı jańa sistema sheńberinde aldaǵı 3-4 jılda mekteplerdegi barlıq klass muǵallimleri jańa metodika tiykarında oqıtıladı. Bunıń ushın:

– 1-iyunǵa shekem hár bir aymaqtaǵı Qánigeligin jetilistiriw orayları tiykarında Pedagoglardı jańa metodikalarǵa úyretiw milliy bilimlendiriw orayları shólkemlestiriledi;

– bul oraylarǵa matematika, fizika, ximiya, biologiya, IT sıyaqlı anıq hám tábiyǵıy pánler boyınsha sırt ellerden eń tájiriybeli qánigeler shaqırıladı;

– sırt elli qánigeler járdeminde joqarı oqıw orınları, milliy bilimlendiriw orayları hám mobil toparlardıń oqıtıwshılarınan ibarat hár bir wálayat kesiminde «trenerler toparları» qáliplestiriledi;

– bul trenerler bolsa orınlarda mektep muǵallimleriniń tikkeley qánigeligin jetilistirip baradı. Olardıń aylıq miynet haqısına 100 procentke shekem ústemeler tólenedi.

Ulıwma alǵanda, joqarıdaǵı jańa sistemalardı engiziw ushın 100 million dollar qosımsha qarjı ajıratıladı», – dedi Shavkat Mirziyoyev.

Prezident bul baǵdardaǵı Qaraqalpaqstan hám Samarqand tájiriybesin úlgi etip kórsetti.

«Máselen, Qaraqalpaqstandaǵı mobil toparlar bir ay dawamında orınlarda muǵallimlerdi oqıtqanı nátiyjesinde olardıń bilim hám kónlikpeleri 15 procentke jaqsılanǵan», – dedi mámleket basshısı.

Usı orında atap ótiw orınlı, Qaraqalpaqstan Respublikasında usı jıldıń 1-mart sánesinen baslap xalıq bilimlendiriw sistemasındaǵı pedagog kadrlardıń qánigeligin jetilistiriw maqsetinde Qaraqalpaq mámleketlik universiteti hám Nókis mámleketlik pedagogikalıq institutınıń tájiriybeli professor-oqıtıwshılarınan ibarat mobil toparlar shólkemlestirilip, olar Beruniy hám Bozataw rayonlarındaǵı mekteplerde óz jumısların alıp bardı. Nátiyjede Prezident atap ótkenindey, bul baǵdarda qısqa waqıttıń ishinde jaqsı nátiyjelerge erisildi.

Jıynalısta Shavkat Mirziyoyev Avloniy institutı Respublikalıq milliy bilimlendiriw orayı sıpatında qayta shólkemlestirilip, Tashkent mámleketlik pedagogikalıq universiteti menen bir sistemaǵa aylandırılatuǵınlıǵın atap ótti.

«Ulıwma alǵanda, jańa metodikalarǵa oqıtıw sisteması Milliy bilimlendiriw orayı hám Tashkent mámleketlik pedagogikalıq universitetinen baslanadı.

Universitet Xalıq bilimlendiriw ministrligi quramına ótedi, mektep muǵallimlerin tayarlaw hám qayta tayarlaw boyınsha respublikadaǵı tayanısh mákemege aylandırıladı», – dedi Prezident.

Islam Matekov,
Qaraqalpaqstan xabar agentliginiń sholıwshısı.