Búgin, 6-aprel kúni Ájiniyaz atındaǵı Nókis mámleketlik pedagogikalıq institutı sport sarayında sporttıń milliy gúres túri boyınsha institut rektorı kubogı ushın bellesiwlerge start berildi.

Jarıstıń ashılıw saltanatında instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov hám professor Perdebay Shılmanovlar shıǵıp sóylep, áyyemgi qádiriyatlarımız, atap aytqanda, mártlik, batırlıq, watan súyiwshilik, gumanizm ideyaların ózinde jámlegen milliy gúresimizdi ǵalabalastırıw, rawajlandırıw hám dúnyaǵa ele de keńnen tanıtıw boyınsha ámelge asırılıp atırǵan jumıslar haqqında atap ótti.

– Institut studentleri arasında milliy gúrestiń ǵalabalıǵına erisiw maqsetinde hár qıylı jarıslar shólkemlestiriw, materiallıq-texnikalıq bazanı jetilistiriw, sport inventarları hám kiyimleri menen támiyinlew sıyaqlı jumıslar turaqlı jolǵa qoyılǵan bolıp, olar arasınan maman kadrlar, trener-oqıtıwshılardı tayarlawda jaqsı nátiyjelerge erisilmekte, – deydi institut sport klubı baslıǵınıń orınbasarı Atabay Erejepov.

Er-jigitler arasında 7 salmaqta, hayal-qızlar arasında 4 salmaq kategoriyasında ótkerilip atırǵan jarısqa instituttıń barlıq fakultetleri menen birge, Qaraqalpaqstan awıl xojalıǵı hám agrotexnologiyalar institutı menen Ózbekstan mámleketlik kórkem óner hám mádeniyat institutı Nókis filialınan ulıwma 150 ge shamalas palwan student-jaslar qatnaspaqta.

Jarıs juwmaqları boyınsha qosımsha maǵlıwmat beriledi.

NMPI baspasóz xızmeti.