Aldın xabar bergenimizdey, Ájiniyaz atındaǵı Nókis mámleketlik pedagogikalıq institutı Pedagogika fakulteti muzıkalıq tálim baǵdarınıń 4-kurs studenti, jas jıraw Dáwranbek Endirbaev «Nihol» mámleketlik sıylıǵınıń laureatı bolǵan edi.

Keshe, 17-aprel kúni Nókis temir jol vokzalında usı mámleketlik sıylıqtıń laureatları bolǵan qaraqalpaqstanlı jas talant iyeleri – jas jıraw Dáwranbek Endirbaev hám Berdaq atındaǵı Qaraqalpaq mámleketlik akademiyalıq muzıkalı teatrı balet artisti Janar Tóreevalar saltanatlı túrde kútip alındı.

Ilajǵa institut jámááti, Dáwranbektiń ustazları, ata-anası, jaqın aǵayin-tuwısqanları, birge oqıytuǵın dosları, keń jámiyetshilik hám ǵalaba xabar qurallarınıń wákilleri qatnastı.

Kútip alıw máresiminde laureatlardıń ustazları sózge shıǵıp, olardıń qolǵa kirgizgen tabısları menen qutlıqladı hám aldaǵı dóretiwshilik jumıslarında tabıslar tiledi.

– Bul sıylıq meni ele de óz ústimde islep, jańa shoqqılarǵa, nátiyjelerge qaray baǵdarlaydı. Maǵan isenim bildirip, qollap-quwatlaǵan ustazlarım, ata-anam, jaqınlarım, sonday-aq, institut jámáátine tereń minnetdarshılıq bildiremen. Keleshekte ata-babalarımızdan miyras bolıp kiyatırǵan jırawshılıq kórkem ónerin bunnan bılay da rawajlandırıp, dúnya júzine alıp shıǵıwǵa, keleshek áwladlarǵa miyras bolıp jetip barıwına bar kúsh-jigerimdi jumsayman, – deydi jas jıraw Dáwranbek Endirbaev.

Maǵlıwmat ornında atap ótiw kerek, D.Endirbaev 2018-jılı Nókis mámleketlik pedagogikalıq institutınıń muzıkalıq tálim baǵdarına oqıwǵa kirip, búgingi kúnge shekem jırawshılıq hám muzıka sırların tájiriybeli professor-oqıtıwshılardan tereń ózlestirip kelmekte.

Ol institut hám respublikalıq kólemde shólkemlestiriletuǵın bayram saltanatları, koncert baǵdarlamalarında belsene qatnasıp kelmekte.

2019-jılı Qazaqstan Respublikası Almatı qalasında bolıp ótken xalıqaralıq kóp janrlı IV «Gloria» tańlaw-festivalında, sonday-aq, 2020-jıl Franciyanıń Parij qalasında «Art Line» xalıqaralıq federaciyası tárepinen ótkerilgen «PRO ART» xalıqaralıq kóp janrlı tańlaw-festivalında 1-orındı iyeledi.

NMPI baspasóz xızmeti.