Búgin, 21-aprel kúni Ájiniyaz atındaǵı Nókis mámleketlik pedagogikalıq institutı matematikanı oqıtıw metodikası hám informatikanı oqıtıw metodikası kafedralarınıń shólkemlestiriwinde «Matematika hám informatika pánlerin oqıtıwdıń mashqalaları hám olardıń sheshimleri» atamasındaǵı respublikalıq ilimiy-ámeliy konferenciya óz jumısın basladı.

Konferenciyanıń ashılıw plenarlıq májilisinde instituttıń ilimiy isler hám innovaciyalar boyınsha prorektorı M.Jalelov, Fizika-matematika fakulteti dekanı R.Jiyemuratov, matematikanı oqıtıw kafedrasınıń baslıǵı, docent B.Prenov, informatikanı oqıtıw metodikası kafedrasınıń baslıǵı, docent M.Alaminovlar sózge shıǵıp, sońǵı jıllarda elimizde ilimiy-izertlew jumısların jańa basqıshqa alıp shıǵıw, ilimpazlar, izleniwshilerdi hár tárepleme qollap-quwatlaw, olardıń jámiyettegi abıroyı hám mártebesin arttırıw baǵdarındaǵı islenip atırǵan jumıslar haqqında aytıp ótti.

Konferenciyada pedagogika ilimleriniń kandidatı, docent N.Jumabaev «Matematikadan ayırım mısallardı hár túrli jollar menen sheshiw usılları», ekonomika ilimleriniń kandidatı, docent A.Abdullaev «Dj.Forrester dinamikalıq modelin algoritmlestiriw» atamalarında bayanatlar jasadı.

Atap ótilgenindey, búgingi kúnde mámleketimizde jetik pedagog kadrlardı tárbiyalaw kúnniń áhmiyetli wazıypalarınıń biri bolıp tabıladı. Bunda, ásirese, matematika páni boyınsha muǵallimlerdi tayarlawdaǵı ayırım mashqalalar, olardı tiyisli juwapker uyımlar menen birgelikte sheshiw boyınsha usınıslar islep shıǵıwda usınday konferenciyalardıń áhmiyeti joqarı bolıp esaplanadı.

Konferenciyanıń ashılıw plenarlıq májilisinde jasalǵan bayanatlar boyınsha soraw-juwaplar, óz ara pikir almasıwlar bolıp ótti.

Konferenciya sekciyalar boyınsha óz jumısın dawam ettirdi.

Maǵlıwmat ornında atap ótiw kerek, «Matematika hám informatika pánlerin oqıtıwdıń mashqalaları hám olardıń sheshimleri» atamasındaǵı respublikalıq ilimiy-ámeliy konferenciya erteń, 22-aprel kúni óz jumısın juwmaqlaydı.

NMPI baspasóz xızmeti.