Joqarı hám orta arnawlı bilimlendiriw ministri Abduqodir Toshqulov magistraturaǵa oqıwǵa qabıllawda qánigelik pánlerden imtixanlardı biykar etiw tártibi kórip shıǵılıp atırǵanın bildirdi. Bul haqqında ministr Qarshı mámleketlik universiteti studentleri menen bolǵan ushırasıwda málim etken, dep jazdı ÓzA.

Ushırasıwda ministrge magistraturaǵa oqıwǵa kiriw ushın shet tilin biliw dárejesi haqqındaǵı sertifikat májbúriy etilgeni haqqında soraw berilgen.

«Usı sorawǵa juwap beriw tiykarında sizlerdi jańa ózgeris haqqında xabarlandırmaqshıman. Bıyıl magistraturaǵa oqıwǵa kiriw ushın qánigelik pánlerden imtixanlardı biykar etiw tártibin kórip shıǵıp atırmız. Ózi bunısız da student 8 semestr dawamında qánigelik pánlerden zárúr kónlikpe hám bilimdi iyeleydi», – dep juwap bergen ministr.

A.Toshqulovtıń sózlerine qaraǵanda, magistratura qánigelikleri boyınsha oqıwǵa kiriw ushın shet tilin biliw dárejesi haqqındaǵı sertifikat hám bakalavr diplomınıń ortasha balı esapqa alınadı. Házirshe bul usınıs úyrenip shıǵılıp atırǵanı atap ótilgen.

Islam Matekov,
Qaraqalpaqstan xabar agentligi.