Usı jıldıń 3-7-may kúnleri aralıǵında Qaraqalpaq mámleketlik universiteti sport sarayında voleybol boyınsha XXIX Ózbekstan chempionatınıń tórtinshi tur oyınları bolıp ótti.

Ótkerilgen tórt turdıń juwmaqları boyınsha Qaraqalpaqstan Respublikasınan qatnasıp atırǵan Nókis mámleketlik pedagogikalıq institutınıń qızlar saylandı komandası ulıwma 42 upay menen 1-orında barmaqta.

Komandamızdan soń 40 upay menen Namangan, al onnan keyingi orındı 39 upay menen Ándijan komandası iyelep turıptı.

Juwmaqlawshı besinshi tur oyınları usı jıldıń 24-31-may kúnleri aralıǵında Jizzaq qalasında bolıp ótedi.

Maǵlıwmat ornında atap ótiw kerek, usı jıldıń iyun ayında voleybol boyınsha Ózbekstan hayal-qızlar saylandı komandası Tailandta bolıp ótetuǵın Aziya chempionatı hám Challenge kubogı jarısına qatnasadı. Saylandı komandaǵa sport veteranı Azat Kazakov trenerlik etedi.

Áhmiyetlisi, NMPI komandasınıń 3 oyınshısı – Dene mádeniyatı fakulteti 3-kurs studentleri N.Reyimbaeva hám U.Turǵanbaeva, sonday-aq, 2-kurs magistrantı A.Joldasbaevalar Ózbekstan saylandı komandası quramında usı jarıslarǵa qatnasıwı kútilmekte.

NMPI baspasóz xızmeti.