1977-jılı Xalıqaralıq muzeyler keńesiniń jıynalısında usı sáneni belgilew boyınsha usınıs kirgizilgen. Solay etip, 1978-jıldan baslap 150 den aslam mámlekette keń túrde belgilenip kelinbekte hám mádeniy miyrastı, dástúrlerdiń úlgilerin keleshek áwladlarǵa jetkeriwde úlken áhmiyetke iye bolmaqta.

Házirgi waqıtta Qaraqalpaqstan Respublikasında I.V.Savickiy atındaǵı Qaraqalpaq mámleketlik kórkem óner muzeyi, Qaraqalpaqstan Respublikası tariyxı hám mádeniyatı mámleketlik muzeyi, Berdaq atındaǵı Qaraqalpaq ádebiyatı tariyxı mámleketlik muzeyi, Repressiya qurbanları esteligi muzeyi, sonday-aq, rayonlarda shólkemlestirilgen muzeyler hám birneshe úy muzeyleri jumıs alıp barmaqta.

Itibarlısı, I.V.Savickiy atındaǵı Qaraqalpaq mámleketlik kórkem óner muzeyi Ózbekstandaǵı eń kóp tamasha etiwshiler keletuǵın muzeylerdiń «TOP-5»ligine kirgen. Maǵlıwmatlarǵa qaraǵanda, muzeyge 50 mıńǵa shamalas adamlar eksponatlardı tamashalawǵa kelgen. «Sahradaǵı Luvr» atanǵan bul muzey Qaraqalpaqstannıń turistlik vizit kartası bolıp esaplanadı.

18-may – Xalıqaralıq muzeyler kúni múnásibeti menen elimizdegi barlıq muzeyler biypul xızmet kórsetip, bayram baǵdarlamaları hám jańa kórgizbeler ashılıwı belgilengen.