Búgin, 27-may kúni Ájiniyaz atındaǵı Nókis mámleketlik pedagogikalıq institutında elimizde ámelge asırılıp atırǵan keń kólemli reformalar, konstituciyalıq reformalardı ámelge asırıw menen baylanıslı jumıslardıń mazmunı hám áhmiyetine baǵıshlanǵan ushırasıw keshesi bolıp ótti.

Ilajǵa Ózbekstan Respublikası Oliy Majlisi Nızamshılıq palatasınıń deputatları – Muxtar Ibragimov, Ruslan Jumamuratov, Baxıtbay Aldamuratov, Qaraqalpaqstan Respublikası Joqarǵı Keńesiniń komitet baslıǵı Sharapat Ótemisov, instituttıń professor-oqıtıwshıları hám belsendi student-jaslar qatnastı.

Ushırasıwdı instituttıń jaslar máseleleri hám ruwxıy-aǵartıwshılıq isleri boyınsha prorektorı Q.Qodirov basqarıp bardı.

Xabarıńız bar, usı jıldıń 20-may kúni Oliy Majlis Senatı hám Nızamshılıq palatası Keńesleriniń qospa májilisinde Ózbekstan Respublikasınıń Konstituciyasına ózgeris hám qosımshalar kirgiziw boyınsha usınıslardı qáliplestiriw jáne shólkemlestiriw ilajların ámelge asırıw boyınsha Konstituciyalıq komissiya shólkemlestirilgen edi.

Ilajda sózge shıqqan deputatlar tárepinen konstituciyalıq reformanı ótkeriwdiń áhmiyeti, Konstituciyalıq komissiyanıń jumısların shólkemlestiriw máseleleri menen baylanıslı úgit-násiyat hám túsinik jumısları alıp barılıp, qatnasıwshılardıń sorawlarına juwaplar berildi hám pikir alısıwlar bolıp ótti.

Atap ótilgenindey, elimizde barlıq tarawlarda alıp barılıp atırǵan keń kólemli reformalar, jámiyetimizdiń jedel túrde rawajlanıwı Bas nızamımızdıń búgingidey real waqıyalarǵa, demokratiyalıq jańalanıwlar procesine sáykes bolıwın támiyinlewdi, rawajlanıw strategiyasına bekkem huqıqıy tiykar jaratıwdı áhmiyetli wazıypaǵa aylandırmaqta. Sonlıqtan, elimizde usı áhmiyetli konstituciyalıq reformalar procesi baslanbaqta.

Konstituciyalıq ózgerislerdi «Insan qádiri ushın», «Jańa Ózbekstan – sociallıq mámleket» principi tiykarında xalkımızdıń abadan turmısınıń bunnan bılay da jetilisiwine, elimizdiń ekonomikalıq tarmaqların transformaciyalaw hám isbilermenlikti jedel rawajlandırıw, insan huqıqları hám máplerin sózsiz támiyinlewge baǵdarlanǵan reformalardı qatań túrde dawam ettiriw ushın bekkem tiykar bolıwı, sonday-aq, Jańa Ózbekstandı qurıw menen birge konstituciyalıq reformalardıń ámelge asırılıwı jámiyettiń rawajlanıwına, xalqımızdıń abadan turmısın jańa basqıshqa kóteriwge xızmet etiwi túsindirildi.

Sonıń menen birge, Konstituciyalıq komissiyanıń tiykarǵı wazıypaları, usınıslardı kórip shıǵıw principleri haqqında da jıynalǵanlarǵa maǵlıwmatlar berildi.

Ushırasıw qatnasıwshıları ózlerin qızıqtırǵan sorawlarǵa juwaplar alıp, pikir hám usınısların bildirip ótti.

NMPI baspasóz xızmeti.