Búgin, 31-may kúni Ájiniyaz atındaǵı Nókis mámleketlik pedagogikalıq institutında Shet tilleri fakulteti rus tili hám ádebiyatı kafedrasınıń shólkemlestiriwinde belgili ilimpaz, filologiya ilimleriniń kandidatı, docent Zulfiya Shamuratovanıń 70 jıllıq yubileyine arnalǵan keshe bolıp ótti.

Keshege institut rektoratı wákilleri, fakultet jámááti, yubiley iyesiniń kásiplesleri, shákirtleri, tuwǵan-tuwısqanları, jaqınları, joqarı oqıw orınları hám ilimiy-izertlew oraylarınıń professorları, ilimpazlar qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Keshede instituttıń Shet tilleri fakulteti dekanı I.Dilmanov sózge shıǵıp, docent Z.Shamuratovanıń ómiri hám ilimiy-pedagogikalıq xızmetleri haqqında ilaj katnasıwshılarına maǵlıwmat berdi.

Zulfiya Shamuratova qaraqalpaq xalqınıń ádiwli perzentleri, ádebiyat hám mádeniyat tarawında girewli ornına iye bolǵan belgili shayır, jazıwshı, dramaturg, dilmash Ámet Shamuratov hám burınǵı awqam xalıq artisti Ayımxan Shamuratovalardıń perzenti bolıp, kishkene waqtınan shańaraqtaǵı ortalıq sebepli kitap oqıwǵa, bilim alıwǵa ayrıqsha ıqlaslı bolıp ósti.

1975-jılı Tashkent mámleketlik universiteti filologiya fakultetiniń rus tili hám ádebiyatı qánigeligin pitkerip shıqtı.

Z.Shamuratova kóp jıllar dawamında jaslarǵa tálim-tárbiya beriw menen birge, ilimiy-izertlew jumısların dawam ettirip, 1992-jılı M.V.Lomonosov atındaǵı Moskva mámleketlik universitetinde «Qaraqalpaq ádebiy sını. Payda bolıw hám qáliplesiw mashqalaları» atamasındaǵı kandidatlıq dissertaciya jumısın tabıslı qorǵadı.

Ilimiy-pedagogikalıq jumısları sheńberinde jáhán hám rus ádebiyatınıń kórnekli wákilleriniń shıǵarmaların túrkiy tillerge kórkem awdarma islewdiń teoriyalıq hám metodologiyalıq mashqalaları boyınsha kóplegen sabaqlıqlar, ilimiy-metodikalıq toplamlardı baspaǵa tayarladı.

Sonıń menen birge, ilimpaz-pedagog «Hár túrli tillerden kórkem awdarmalar (russha-ózbekshe hám qaraqalpaqsha)» atamasındaǵı doktorlıq dissertaciyasın tayarladı.

Onıń usınday miynetlerin esapqa alıp, húkimetimiz tárepinen Ózbekstan Respublikası xalıq bilimlendiriw aǵlası kókirek nıshanı menen sıylıqlandı.

Keshede Z.Shamuratovanıń kásiplesleri, shákirtleri, jaqın aǵayin-tuwısqanları sózge shıǵıp, yubiley iyesiniń ómiri, alıp barǵan ilimiy-izertlew jumısları, onıń adamgershilik pazıyletleri, shańaraq hám jumıstaǵı pidayılıq xızmetleri haqqında kóplegen maǵlıwmatlar berdi.

Ilaj instituttıń talantlı studentleri tárepinen tayarlanǵan koncert baǵdarlaması menen dawam etti.

NMPI baspasóz xızmeti.