Búgingi kúni elimizde Prezidentimiz Sh.Mirziyoyev basshılıǵında keleshek áwladlarımız esaplanǵan balalar tárbiyası, olarǵa hár tárepleme ǵamqorlıq kórsetiw, múnásip sharayatlar jaratıp beriw baǵdarında keń kólemli jumıslar ámelge asırılmaqta. Ásirese, bunday itibar hám ǵamqorlıqlardan hesh kim shette qalmay atırǵanın ayrıqsha atap ótiw orınlı.

1-iyun – Xalıqaralıq balalardı qorǵaw kúni múnásibeti menen Nókis qalasındaǵı «Imkan» reabilitaciyalıq orayǵa iye bolǵan mámleketlik qánigelestirilgen kóp tarmaqlı mektepke shekemgi bilimlendiriw mákemesinde bayram ilajı bolıp ótti.

Ilajǵa Qaraqalpaqstan Respublikası Joqarǵı Keńesiniń Baslıǵı M.Kamalov, sonday-aq, Qaraqalpaqstan Respublikası prokuraturası, joqarı oqıw orınlarınıń basshıları qatnastı.

Bayram ilajında Ájiniyaz atındaǵı Nókis mámleketlik pedagogikalıq institutı rektorı B.Otemuratov tárbiyalanıwshılarǵa bayram sawǵaların tapsırdı.

Respublikamızda birinshi bolıp shólkemlestirilgen usı qánigelestirilgen mektepke shekemgi bilimlendiriw mákemesi hár qıylı fizikalıq nuqsanı bolǵan balalardı sociallıq-mádeniy ortalıqqa tartıw, olardı mektepke shekemgi bilimlendiriw hám salamatlastırıw reabilitaciyası menen támiyinlewge qánigelestirilgen.

Bul jerde 127 bala tárbiyalanıp atırǵan bolıp, qánigelestirilgen kóp tarmaqlı mektepke shekemgi bilimlendiriw mákemesinde standart bólmelerden tısqarı, basseyn, emlew-denetárbiyası zalı, 2 fizioterapiya bólmesi, 2 massaj bólmesi, sensor bólmesi, mayda motorikanı rawajlandırıw, sociallıq-turmıslıq iykemlesiw, muzıka hám art-terapiya bólmesi, ortoped, psixolog, pediatr, dietolog, logoped, reabilitolog, psixonevrolog, metodist hám náwbetshi shıpaker bólmeleri menen támiyinlengen.

Ilaj qánigelestirilgen mektepke shekemgi bilimlendiriw mákemesi jámááti hám tárbiyalanıwshıları tárepinen tayarlanǵan koncert baǵdarlaması menen dawam etti.

NMPI baspasóz xızmeti.