Búgin, 3-iyun kúni Ájiniyaz atındaǵı Nókis mámleketlik pedagogikalıq institutınıń úlken májilisler zalında sırtqı tálim baǵdarlarınıń 1-kurs studentleri menen ushırasıw bolıp ótti.

Ilajǵa institut rektorı Bayrambay Otemuratov qatnasıp, student-jaslar menen ashıq sáwbetlesiw ótkerdi.

Sáwbetlesiw dawamında institutta sırtqı tálim baǵdarları boyınsha kadrlar tayarlaw máselesi, bul baǵdarda ámelge asırılıp atırǵan jumıslar hám aldaǵı jobalar boyınsha maǵlıwmatlar berildi.

– Sırtqı tálim baǵdarlarında oqıtıwdıń sapalı hám zamanagóy bolıwı ushın aldımızǵa birneshe maqsetlerdi belgilep alǵanbız, – dedi institut rektorı B.Otemuratov. – Birinshiden, kelesi oqıw jılınan baslap bir oqıw jılı dawamında sırtqı tálim baǵdarları studentleriniń dástúriy oqıwın tórt márte shólkemlestiriw, ekinshiden, sırtqı bólim ushın arnawlı oqıw imaratı hám zamanagóy laboratoriyalar shólkemlestiriw, úshinshiden, sırtqı tálim baǵdarlarında studentlerdiń bántligin támiyinlew maqsetinde ekinshi kurstan baslap óz qánigelikleri sheńberinde jumıs islewine múmkinshilikler jaratıw, sonday-aq, tólemli shártnama boyınsha jańa talaplardı islep shıǵıw máselelerin kórip shıǵıp atırmız.

Ashıq-aydın ruwxta ótken sáwbetlesiw dawamında sırtqı tálim baǵdarları studentleri oqıw procesi menen baylanıslı orın alıp atırǵan ayırım mashqalalar, sonıń menen birge, oqıwın kóshiriw, studentlerdiń bos waqıtların mazmunlı ótkeriw maqsetinde sport hám mádeniy-ruwxıy ilajlarǵa qamtıw dárejesin arttırıw máseleleri boyınsha soraw-juwaplar, pikir almasıwlar bolıp ótti.

NMPI baspasóz xızmeti.