Nókis qalalıq 2-sanlı balalar hám jas óspirimler sport mektebi filialında respublikamızdaǵı barlıq qala hám rayonlarda jumıs islewshiler arasında «Biz – sportshı shańaraqpız!» súreni astında shańaraqlıq sport jarıslarınıń Qaraqalpaqstan Respublikalıq basqıshı ótkerildi.

Oǵan usı jarıstıń qalalıq hám rayonlıq basqıshlarında, birneshe tarawlar arasında ótkerilgen basqıshlarda jeńimpaz bolǵan 9 komanda qatnasıp, óz ara bellesti.

Kún dawamında ótkerilgen 7 túrdegi estafetalıq sport jarısları tájiriybeli tóreshiler tárepinen bahalanıp barıldı.

Jarıs juwmaǵında bilimlendiriw hám ilim tarawınan qatnasqan, Ájiniyaz atındaǵı Nókis mámleketlik pedagogikalıq institutı Dene mádeniyatı fakultetiniń aǵa oqıtıwshısı Rustam Haydarovtıń shańaraǵı 1-orındı iyeledi.

– Shańaraǵımız benen sport penen shuǵıllanamız. Ótkerilip atırǵan bunday jarıslar, shınında da adamlardı sport penen shuǵıllanıwǵa qızıqtırıw, ósip kiyatırǵan perzentleriniń de densawlıǵına biypárwa bolmay, olardı da sporttıń qanday da bir túrine tartıwǵa iytermeleydi, dep oylayman. Shańaraǵımız benen jarıstıń endigi basqıshında da jaqsı qatnasıp, jeńimpaz bolıw ushın háreket etemiz,-deydi jeńimpaz shańaraq basshısı Rustam Haydarov.

Jeńimpazlar Ózbekstan kásiplik awqamları Federaciyası Qaraqalpaqstan Keńesi tárepinen tayarlanǵan kubok, diplom hám estelik sawǵaları menen sıylıqlandı.

Solay etip, tarawlar arasında eń joqarı ball toplap, birinshi orındı iyelegen Rustam Haydarov shańaraǵı jarıstıń Namangan wálayatında ótkeriletuǵın Ózbekstan Respublikalıq basqıshına jollama aldı.

Qaraqalpaqstan xabar agentligi.