Ájiniyaz atındaǵı Nókis mámleketlik pedagogikalıq institutında tyutorlar tárepinen alıp barılıp atırǵan jumıslar, ushırasıp atırǵan mashqalalar hám olardıń sheshimlerine baǵıshlanǵan jıynalıs bolıp ótti.

Oǵan instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov, rektor másláhátshisi O.Srajatdinov, instituttıń studentlerdi turaq jay menen támiyinlew jumısların muwapıqlastırıw bóliminiń baslıǵı Q.Sharipov hám bólim qánigeleri, sonday-aq, barlıq fakultetlerde jumıs islep atırǵan tyutorlar qatnastı.

Házirgi waqıtta institutta ulıwma 11 fakultette 61 tyutor jumıs islep atırǵan bolıp, olar tárepinen ámelge asırılǵan jumıslardıń nátiyjeliligin arttırıw áhmiyetli wazıypalardıń biri bolıp esaplanadı.

Ilajda prorektor Q.Qodirov tyutorlar tárepinen ótken jıldıń noyabr ayınan usı jıldıń iyun ayları aralıǵında ámelge asırılǵan jumıslarınıń monitoringi boyınsha prezentaciya islenip, orın alıp atırǵan ayırım mashqalalar hám olardıń sheshimleri kórsetip ótildi.

Atap aytqanda, studentlerdiń ijara tólemleri menen baylanıslı hújjetlerde, sonday-aq, basqa da jumıs procesinde tyutorlar tárepinen jol qoyılǵan kemshilikler boyınsha usı kúnge shekem 145 túsinik xat alınǵanı, olar arasında bir emes, birneshe márte kemshiliklerge jol qoyıp atırǵan tyutorlar bar ekenligin málim etip, olar menen sáwbetlesiw alıp barıldı.

Sonıń menen birge, tyutorlardıń jumısları studentler bántligin támiyinlew, alıp barılıp atırǵan jumıslarınıń institut rásmiy veb-saytı hám sociallıq tarmaqlardaǵı kanalları arqalı járiyalanıwı, ijarada jasaytuǵın studentler menen ijara shártnamaların dúzdiriw, studentlerdiń sabaqlarǵa qatnası, sonday-aq, jınayatshılıq hám huqıqbuzarlıqlardıń aldın alıw sıyaqlı ólshemler tiykarında analizlenip, olardıń nátiyjeleri dodalandı.

Sonday-aq, jıynalısta óz lawazımlıq wazıypaların shın júrekten, bar ıqlası hám kásiplik sheberligi, turmıslıq tájiriybesi, hújdanı menen atqarıp atırǵan tyutorlar bar ekenligi atap ótildi.

Hár tárepleme úlgi bolıp, belsendilik kórsetip kiyatırǵan bir topar tyutorlar institut rektorınıń húrmet jarlıǵı menen sıylıqlandı.

Jıynalısta bunnan bılay tyutorlar jumıslarınıń monitoringin turaqlı túrde alıp barǵan halda, hár úsh ayda bir márte usınday talqılawlardı ótkeriw boyınsha tiyisli tapsırmalar berildi.

NMPI baspasóz xızmeti.