Ájiniyaz atındaǵı Nókis mámleketlik pedagogikalıq institutı qaptalınan qurılıwı belgilengen 90 orınǵa mólsherlengen jańa hám zamanagóy tiptegi mektepke shekemgi bilimlendiriw shólkemi imaratı, sonday-aq, mámleketlik-jeke menshik sheriklik tiykarında qurılatuǵın 500 orınlıq jańa studentler turaq jayınıń irge tası qalandı.

Ilajǵa Ózbekstan Respublikası Joqarı hám orta arnawlı bilimlendiriw ministrligi janındaǵı Ruwxıylıq hám aǵartıwshılıq orayınıń direktorı Fozilbek Farhodov, Qaraqalpaqstan Respublikası Ministrler Keńesi Baslıǵınıń orınbasarı Abatbay Dániyarov, institut jámááti, jasıúlken professor-oqıtıwshılar, aymaqtıń nuranıy aqsaqalları hám keń jámiyetshilik wákilleri qatnastı.

Sońǵı jıllarda mámleketimizde joqarı bilimlendiriw tarawın sapa hám dáreje tárepinen jańa basqıshqa alıp shıǵıw, jaslardıń bilim alıwı, joqarı tájiriybe hám kónlikpelerge iye maman kadrlar bolıp jetilisiwi ushın múnásip sharayatlar, imkaniyatlar jaratıwǵa ayrıqsha itibar qaratılmaqta.

Qurılısı baslanıp atırǵan mektepke shekemgi bilimlendiriw shólkemi institutta mektepke shekemgi tálim hám defektologiya tálim baǵdarlarında oqıp atırǵan student-jaslar ushın úlken imkaniyatlar esigin ashıp beredi. Bul jerde olar tájiriybeli professor-oqıtıwshılar, tiyisli qánigeler menen birgelikte hár qıylı bilimlendiriw metodikaları hám usılların islep shıǵıwı, tájiriybeden ótkeriwi múmkin boladı. Sonıń menen birge, bul jerde perzentli studentler óz balalarına tálim-tárbiya beriwi ushın usı jerde jaratılǵan sharayatlardan da paydalanıw imkaniyatı bar.

Sonday-aq, usı kúni paytaxtımızdıń «Qumbız awıl» mákan puqaralar jıyını aymaǵında mámleketlik-jeke menshik sheriklik tiykarında qurılıwı jobalastırılǵan instituttıń 500 orınlıq jańa studentler turaq jayınıń irge tası qoyıldı.

Ilaj qatnasıwshıları mámleketimiz basshısınıń pármanı tiykarında tastıyıqlanǵan «Jańa Ózbekstannıń 2022-2026-jıllarǵa mólsherlengen rawajlanıw strategiyasın «Insan qádirin ulıǵlaw hám belsendi máhálle jılı»nda ámelge asırıwǵa baylanıslı mámleketlik baǵdarlama», sonıń menen birge, Ózbekstan Respublikası Ministrler Kabinetiniń «Respublikalıq joqarı bilimlendiriw mákemelerinde studentlerdi turaq jay menen qamtıp alıw dárejesin arttırıw ilajları haqqında»ǵı qararı tiykarında alıp barılıp atırǵan usınday iygilikli jumıslar usı máselege mámleketlik hám húkimetlik dárejede ayrıqsha itibar qaratılıp atırǵanınan dárek beretuǵınlıǵın atap ótti.

Ilajda jańa imaratlar qurılısınıń irge tasları qoyılıp, qurılıs jumıslarınıń óz waqtında hám sapalı bolıp shıǵıwı ushın tilekler bildirildi.

NMPI baspasóz xızmeti.