Bıyılǵı jılı Ózbekstandaǵı joqarı oqıw orınlarına kiriw test sınaqlarında 1 million 73 mıń 821 abiturient qatnasqan. Bul haqqında Mámleketlik test orayınıń my.dtm.uz saytındaǵı ashıq maǵlıwmatlarǵa tiykarlanıp huqıqtanıwshı-bloger X.Xudayberdiev málim etti.

Testke qatnasqan usı abiturientlerdiń 550 mıńı – yaǵnıy 51,2 procenti ótiw balınıń eń tómengi shegarası esaplanǵan 56,7 balldı da toplay almaǵan.

Bloger bıyılǵı kórsetkishlerdi ótken jıldaǵısı menen salıstıra otırıp, tómendegishe pikir bildirgen:

«Ótken jıldaǵı jaǵday menen salıstırǵanda awhal jáne de tómenlegen. Ótken jılı 36 procent abiturient 56,7 balldı da toplay almaǵan edi, bıyıl bul kórsetkish 51,2 procentke kóterildi. Álbette, bunda májbúriy bloktaǵı ańsat sorawlarǵa beriletuǵın ballar muǵdarı kemeytilip, qánigelik pánlerge úlken itibar qaratılǵanlıǵı da sebep boldı».

Bıyıl Ózbekstan boyınsha eń tómengi kórsetkish ótken jıldaǵı sıyaqlı Tashkent wálayatında (55,9 procent), salıstırmalı jaqsıraq nátiyje bolsa Tashkent qalasında (45,2 procent) dizimge alınǵan.

Maǵlıwmatlarda kórsetiliwinshe, Qaraqalpaqstan Respublikasında ulıwma test imtixanlarına 69 807 abiturient qatnasqan bolsa, sonnan 37 115 abiturient (53,2 procent) 56,7 balldan tómen kórsetkishke erisken.

Tashkent qalası, Buxara, Ferǵana, Xorezm hám Samarqand wálayatlarında bul boyınsha kórsetkishler 50 procentten az ekenligi málim boldı.

«56,7 ball – bul toplaw múmkin bolǵan eń joqarı 189 balldıń 30 procenti bolıp esaplanadı. Yaǵnıy abiturient hesh bolmaǵanda 30 procentlik bilimge iye bolsa, usı kórsetkishti toplay aladı. 30 procentlik bilim bolsa reyting sistemasına salıstırǵanda hátteki 2 bahaǵa da tuwra kelmeydi! Múmkin, 1 baha desek durıs bolar», – dep jazǵan X.Xudayberdiev.

Qaraqalpaqstan xabar agentligi.