Búgin, 8-sentyabr kúni Qaraqalpaqstan Respublikası Ministrler Keńesi Baslıǵınıń Jaslar siyasatı, sociallıq rawajlandırıw hám ruwxıy-aǵartıwshılıq máseleleri boyınsha orınbasarı Abatbay Daniyarov Ájiniyaz atındaǵı Nókis mámleketlik pedagogikalıq institutına keldi.

Dáslep instituttıń Túrkiy tiller fakulteti qaraqalpaq tili hám ádebiyatı tálim baǵdarınıń 2-kurs studentleri menen sáwbetlesiw bolıp ótti. Sáwbetlesiw dawamında sońǵı jıllarda elimizde jaslarǵa baylanıslı mámleketlik siyasat, keleshek iyeleriniń oqıwı, bilim alıwı, ilim menen shuǵıllanıwı, kásip-óner úyreniwi ushın jaratılıp atırǵan sharayatlar – ulıwma xalqımızdıń abadan turmısın támiyinlew, insan qádirin ulıǵlaw baǵdarında alıp barılıp atırǵan keń kólemli reformalar haqqında jaslar menen pikir almasıldı.

2-kurs studentleri arasında Qaraqalpaqstan Respublikası Joqarǵı Keńesiniń «Úmit ushqını» kókirek belgisiniń iyesi bolǵan, sonday-aq, Bozataw, Moynaq rayonlarınan bolǵan studentler instituttaǵı oqıw procesi, jaratılıp atırǵan imkaniyatlar menen birge, ózleri jasap atırǵan rayonlarda da sońǵı jıllarda úlken tariyxıy ózgerisler, jańalanıwlar bolǵanlıǵın atap ótti.

Sonday-aq, jaslar Bozataw rayonındaǵı Berdaq baǵında ádebiy keshe shólkemlestiriw, Moynaq rayonında jaslar turmısında eń zárúr bolǵan «Liderler kitabı» atamasındaǵı kitaptıń prezentaciyasın ótkeriw usınısların bildirdi, sonday-aq, ózleri tárepinen ámelge asırılıp atırǵan sociallıq joybarlar, volontyorlıq jumısları haqqında maǵlıwmatlar berdi. Jaslar menen bolǵan sáwbetlesiwden soń Ministrler Keńesi Baslıǵınıń orınbasarı usı fakultette jaslardıń bos waqıtlarında shet tillerin úyreniw ushın shólkemlestirilgen dógerek hám ol jerdegi sharayatlar menen tanıstı.

Bunnan soń Abatbay Daniyarov instituttıń «Tumaris» qosıq hám ayaq-oyın xalıq ansambliniń jumısları menen tanıstı. Xalıq ansambli baletmeysteri Amir Reyipnazarov penen bolǵan sáwbetlesiwde ansambldiń jumısların bunnan bılay da rawajlandırıw boyınsha usınıslardı tıńladı. Bul boyınsha institut rektoratı menen birgelikte islenetuǵın jumıslardı belgilep aldı.

Bunnan soń qurılıs jumısları qızǵın pátlerde dawam etip atırǵan instituttıń 2000 orınlıq tiykarǵı oqıw imaratında bolıp, bul jerde málimleme-resurs orayı hám oqıw auditoriyalarınıń zamanagóy kóriniste úskeneleniwi, jaslar ushın qosımsha rekreativ sharayatlardı jaratıw boyınsha usınısların bildirdi.

Sonıń menen birge, rekonstrukciya jumısları juwmaqlanıw aldında turǵan instituttıń 4-oqıw imaratındaǵı alıp barılıp atırǵan jumıslardı kózden ótkerdi.

NMPI baspasóz xızmeti.