Usı jıldıń 12-17-sentyabr kúnleri respublikamızdaǵı barlıq joqarı oqıw orınlarında jaslar jetekshilerin saylaw boyınsha esap beriw hám saylaw májilisleri hápteligi dep járiyalanǵan edi.

Usı tiykarda NMPIdiń barlıq akademiyalıq toparlarında jaslar awqamınıń topar, sonday-aq, fakultet jetekshileri, sonıń menen birge, studentler keńesiniń jetekshilerin saylaw jumısları alıp barılmaqta.

Atap aytqanda, Pedagogika fakultetinde ótkerilgen saylawda jaslar awqamı jetekshiligine mektep menedjmenti tálim baǵdarınıń 3-kurs studenti A.Jumatov, al studentler keńesi jetekshiligine bolsa usı tálim baǵdarınıń 3-kurs studenti A.Seytniyazovalar saylandı.

Baslawısh tálim fakultetinde dáslep jaslar qatnasıwında jınayatshılıq, huqıq buzarlıqlardıń aldın alıw, instituttıń ishki tártip- qaǵıydalarına ámel etiw, studentler qatnasıwında jol-transport hám hár qıylı unamsız hádiyselerdiń profilaktikası máseleleri boyınsha májilis bolıp ótti. Bunnan soń jaslar awqamı hám studentler keńesine saylaw máselesi kórip shıǵılıp, dawıs beriw jolı arqalı 4-kurs studenti G.Berdibaeva studentler keńesine, al 3-kurs studenti E.Ashirov jaslar awqamına jetekshi etip saylandı.

Tábiyǵıy pánler fakultetinde ótkerilgen saylawda biologiya tálim baǵdarınıń 3-kurs studenti N.Joldasbaev jaslar awqamı jetekshisi, sonday-aq, ximiya tálim baǵdarınıń 2-kurs studenti Z.Abdireymov studentler keńesi jetekshiligine saylandı.

Saylaw jumısları Fizika-matematika fakultetinde de dawam etip, saylawlar nátiyjesine muwapıq, 4-kurs studenti S.Ospanova jaslar awqamına, al 3-kurs studenti I.Kewnimjaeva studentler keńesine jetekshi boldı.