Assalawma áleykum, húrmetli oqıtıwshılar, áziz muǵallim hám ustazlar!

Sizlerdi, siz arqalı ustaz degen ullı ataqqa erisken barlıq qádirli insanlardı 1-oktyabr – Muǵallimler hám ustazlar kúni menen Ájiniyaz atındaǵı Nókis mámleketlik pedagogikalıq institutı rektoratı atınan shın shúrekten qutlıqlayman.

Mámleketimizdiń búgini hám keleshegi, onıń mádeniy-aǵartıwshılıq hám ruwxıy potencialı bilimlendiriw sistemasınıń qay dárejede rawajlanǵanı menen belgilenedi. Tálim-tárbiya sistemasındaǵı reformalardıń nátiyjeliligi bolsa tikkeley muǵallim hám oqıtıwshılarǵa baylanıslı. Sol sebepli, elimizde usı taraw pidayılarınıń abıroyı hám mártebesin bunnan bılay da arttırıw, jaslardıń bilimli, qábiletli hám ónerli bolıwı ushın barlıq sharayatlar jaratılmaqta.

Hár bir insan qay jerde jumıs islese de, qanday kásip yamasa lawazım iyesi bolıwına qaramastan, oǵan bilim hám tárbiya berip, ómirge úlken qádem taslatqan húrmetli muǵallim hám ustazlarınıń aldında bárqulla qarızdar bolıp esaplanadı.

Dúnyada imaratlar ishinde eń ullısı mektep bolsa, kásipler ishindegi eń maqtanıshlısı muǵallimshilik hám ustazlıq bolıp tabıladı. Óytkeni, ustaz bergen tárbiya hár bir insannıń ómirinde jol kórseter shamshıraq sıyaqlı.

«Ustazım» dep, jaslar arqa súyegen,
Aldıńızda aq basımdı iyemen.
Keleshektiń gúlshanına gúl ekken,
Men muǵallim degen xalıqtı súyemen! – dep xalıq shayırı, Ózbekstan Qaharmanı Ibrayım Yusupov atap ótkenindey, dúnyadaǵı eń ullı kásip iyeleri – ustazlarǵa barlıq adamlar húrmet penen bas iyedi.

Qádirli, muǵallimler hám ustazlar!

Jáne bir márte, Sizlerdi bayramıńız benen qutlıqlay otırıp, uzaq ómir, baxıt-ıǵbal, shańaraǵıńızǵa ırısqı-nesiybe, bárkamal áwladlardı tárbiyalawday iygilikli islerińizde úlken tabıslar tileymen!

Sheksiz húrmet penen,

Bayrambay Otemuratov.
Ájiniyaz atındaǵı Nókis mámleketlik pedagogikalıq institutınıń rektorı.