Ájiniyaz atındaǵı Nókis mámleketlik pedagogikalıq institutında voleybol boyınsha Ózbekstan Respublikası Joqarı hám orta arnawlı bilimlendiriw ministri kubogi jarısınıń institut basqıshı bolıp ótti.

Student-qızlar arasında ótkerilgen jarısqa instituttıń barlıq fakultetlerinen dúzilgen komandalar qatnasıp, ózleriniń sport sheberlikleri hám tayarlıqların sınap kórdi.

Xabarıńız bar, instituttıń voleybol boyınsha qızlar komandası tek ǵana Qaraqalpaqstan hám Ózbekstan kóleminde emes, Aziya birinshilikleri jáne xalıqaralıq sport jarıslarında da joqarı nátiyjelerdi qolǵa kirgizip kelmekte. Sport veteranı Azat Kazakov basshılıǵında shuǵıllanıwlar alıp barıp atırǵan voleybolshı qızlar «Universiada» sport jarısları, sonday-aq, Ózbekstan chempionatı, kubok jarısları hám super kuboginiń birneshe márte jeńimpazları boldı. Bunday kórsetkishlerge erisiwdiń tiykarı, álbette, institutta studentler arasında usınday jarıslardıń turaqlı ótkerilip turǵanlıǵınıń nátiyjesi bolıp tabıladı.

Eki kún dawam etken jarıstı instituttıń tájiriybeli trener-oqıtıwshıları baqlap bardı.

Solay etip, joqarı oqıw orınlarında birinshi márte ótkerilip atırǵan «Ministr kubogi» jarısınıń institut basqıshında Dene mádeniyatı fakulteti komandası 1-orındı iyeledi hám Qaraqalpaqstan Respublikalıq basqıshına jollama aldı. 2-orın Shet tilleri hám 3-orın Baslawısh tálim fakulteti komandalarına nesip etti.

Jarıs juwmaǵında shólkemlestiriwshiler sózge shıǵıp, barlıq qatnasıwshılarǵa minnetdarshılıq bildirdi hám jeńimpazlardı qutlıqlap, olarǵa diplom, medallar hám kubokti tapsırdı.

Maǵlıwmat ornında atap ótiw kerek, «Ministr kubogi» sport jarısları barlıq joqarı oqıw orınlarında student-qızlar arasında voleybol boyınsha, al erler arasında mini fubol boyınsha ótkeriliwi belgilengen.

NMPI baspasóz xızmeti.