Ájiniyaz atındaǵı Nókis mámleketlik pedagogikalıq institutında Ózbekstan hám Qaraqalpaqstan Respublikasına miyneti sińgen ilim ǵayratkeri, Berdaq atındaǵı mámleketlik sıylıqtıń laureatı, filosofiya ilimleriniń doktorı, professor, akademik Jumanazar Bazarbaevtıń 89 jıllıǵına baǵıshlanǵan eslew keshesi ilajları sheńberinde ilimiy konferenciya bolıp ótti.

Ilaj qatnasıwshıları dáslep ilimpazdıń eslew keshesine arnap shólkemlestirilgen onıń ómiri hám ilmiy dóretiwshiligi menen baylanıslı dóretpeler, súwretler hám hújjetlerdiń kórgizbesi menen tanıstı.

Konferenciyanı instituttıń Jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov ashtı hám alıp bardı.

Konferenciya miymanları sıpatında qatnasqan pedagogika ilimleriniń doktorı, professor M.Quranov videokonferenciya arqalı óz bayanatları menen shıǵıp sóyledi.

Bunnan soń akademik penen birge islesken ilimpazlar Arzı Pazılov, Tariyx fakulteti dekanı M.Sarıbaev, Milliy ideya, ruwxıylıq tiykarları hám huqıq tálimi kafedrası baslıǵı E.Tilewov, úlken oqıtıwshı J.Usenov hám basqa da kásiplesleri alımnıń ómir jolı, ilimiy dóretiwshiligi haqqında keń túrde bayanat jasadı.

Sózge shıqqanlar óziniń pidayı miyneti hám adamgershiligi menen pútkil elimizde úlken abıroy arttırǵan aqsaqal Jumanazar Bazarbaevqa degen xalıqtıń húrmeti júdá joqarı ekenligin, bunday insanlarǵa húrmet kórsetiw bárqulla institut jámááti itibarında bolıp, olardıń atların máńgilestiriw boyınsha bir qatar jumıslardıń islenip atırǵanlıǵın aytıp ótti.

Konferenciya juwmaǵında akademik Jumanazar Bazarbaevtıń pútkil ómiri dawamında ilim hám bilimlendiriwdi rawajlandırıwǵa, jaslarımızdıń hár tárepleme kámil insanlar bolıp qáliplesiwine, elimiz abıroyınıń ele de artıwına qosqan salmaqlı úleslerin tek ǵana búgingi áwladqa emes, al keleshek áwladlarǵa da úlgi sıpatında kórsetiwge qaratılǵan konferenciya qararları qabıl etildi.
Akademikti eslew keshesi ilajları sheńberinde Tariyx fakulteti studentleri tyutorları basshılıǵında Jumanazar Bazarbaevtıń atın máńgilestiriw, onıń ómir hám miynet jolın keleshek áwladlarǵa úlgi etip kórsetiw maqsetinde ilimpazdıń atına shólkemlestirilgen muzeydi tamashaladı.

Student-jaslar muzeyde ilimpazdıń jaslıq dáwirinen baslap basıp ótken ómir jolın sáwlelendiriwshi fotobannerler, ilimpazdıń qalemine tiyisli dóretpeler, miynet jolı dáwirinde qolǵa kirgizgen mámleketlik sıylıqları, kókirek nıshanları, diplomlar, húrmet jarlıqları, fotoalbomları hám ilimpaz haqqında dóretilgen videoroliklerdi tamashaladı.

NMPI baspasóz xızmeti.