Ájiniyaz atındaǵı Nókis mámleketlik pedagogikalıq institutında Ózbekstan Respublikası Prezidenti Sh.M.Mirziyoyev tárepinen alǵa súrilgen bes baslama sheńberinde bir qatar áhmiyetli jumıslar ámelge asırılmaqta.

Usınday jumıslardıń mısalı sıpatında institut rektorı B.Otemuratovtıń qollap-quwatlawı menen Tariyx fakulteti jámááti tárepinen Moynaq rayonı jasları menen birgelikte ámelge asırǵan áhmiyetli baslamaların atap ótiw orınlı.

Fakultet dekanı M.Sarıbaev basshılıǵındaǵı professor-oqıtıwshılar hám studentlerdi rayon hákiminiń orınbasarı M.Baltabaev kútip aldı hám ilajlardı ótkeriwde tabıslar tiledi.

Bunnan soń studentler «Bes baslama» tiykarında ámelge asırılatuǵın jumıslar boyınsha professor-oqıtıwshılar basshılıǵında toparlarǵa bólinip, belgilengen ilajlardı shólkemlestiriwge kiristi.

Atap aytqanda, rayondaǵı «Book Cafe»de rayon jasları menen birge kórkem-ádebiy shıǵarmalar, kitaplar haqqında sáwbetlesiwler, óz ara pikir almasıwlar, ótkerilgen bolsa, bul ilaj sońınan «Zakovat» intellektual oyını menen dawam etti.

Rayonda bıyılǵı oqıw jılınan baslap óz jumısın baslaǵan qánigelestirilgen mektep oqıwshıları qatnasıwında psixologiyalıq oyınlar, sonday-aq, inglis tilin úyreniw boyınsha sheberlik sabaqları shólkemlestirildi.

Belgilengen ilajlar sheńberinde sportqa qızıǵıwshı jaslar menen birgelikte voleybol boyınsha jarıs bolıp ótti. Sonıń menen birge, rayon orayındaǵı «IT-Center»de informaciyalıq texnologiyalarǵa qızıǵıwshı jaslar qatnasıwında óz ara bilim hám tájiriybe almasıw sabaqları ótkerildi.

Elimiz boylap kóterińki ruwx hám úlken shólkemleskenlik penen ótkerilgen «Jasıl mákan» ulıwma milliy joybarı tiykarında dekorativ hám miywe tereklerinen 400 túp nál otırǵızıldı.

«Bes baslama»nı Moynaq rayonı jasları arasında bunnan bılay da keń en jaydırıw maqsetinde ámelge asırılǵan ilajlardıń juwmaǵında barlıq qatnasıwshı jaslar, sonıń ishinde, ótkerilgen jarıslar, intellektual oyınlar, sáwbetlesiwler hám basqa da ilajlarǵa belsene qatnasqan rayon jasları institut rektorınıń húrmet jarlıqları hám estelik sawǵalar menen sıylıqlandı.

Institut jaslarınıń Moynaqqa saparı umıtılmas máwritlerge bay boldı.