Ájiniyaz atındaǵı Nókis mámleketlik pedagogikalıq institutı 2022-2023-oqıw jılınan baslap Malayziyanıń Lincoln University College oqıw ornı menen mektepke shekemgi bilimlendiriw baǵdarı boyınsha qospa tálim baǵdarlamasın jolǵa qoydı.

Institut tariyxında birinshi márte jolǵa qoyılıp atırǵan usı qospa tálim baǵdarlaması Ózbekstan Respublikası Prezidentiniń «Ózbekstan Respublikası joqarı bilimlendiriw sistemasın 2030-jılǵa shekem rawajlandırıw koncepciyasın tastıyıqlaw haqqında»ǵı hám «Joqarı hám orta arnawlı bilimlendiriw sistemasın basqarıwdıń jańa principlerin engiziw ilajları haqqında»ǵı qararlarında belgilengen wazıypalardan kelip shıǵıp, sonday-aq, Ózbekstan Respublikası hám sırt ellerdiń joqarı bilimlendiriw shólkemleriniń óz ara birge islesiwi boyınsha «Qospa tálim baǵdarlaması» tiykarında ámelge asırılmaqta.

Dúnya júziniń abıroylı reyting shólkemleri tárepinen «TOP-300»lik joqarı oqıw orınları qatarına kirgizilgen Lincoln University College oqıw ornı menen birgelikte jolǵa qoyılıp atırǵan qospa tálim baǵdarlaması bakalavriattıń «60110200 – Mektepke shekemgi tálim» kúndizgi bilimlendiriw baǵdarı boyınsha tólemli kontrakt tiykarında ámelge asırılıwı belgilengen. Bunda oqıw múddeti 3 jıl bolıp, oqıw procesi tolıq inglis tilinde ótkeriledi.

Usı jıldıń 15-sentyabr kúnine shekem abiturientlerden onlayn tárizde hújjetler qabıl etilgen bolsa, oktyabr-noyabr aylarında ana tili hám ádebiyatı, biologiya, sonday-aq, Mámleketlik test orayı menen birgelikte inglis tili pánlerinen test sınaqları ótkerildi. Usı imtixanlardan tabıslı ótken 20 abiturient studentler qatarına qosılıp, búgin, 12-dekabrden baslap oqıw procesin basladı.

Qospa tálim baǵdarlaması boyınsha oqıwdıń dáslepki sabaq procesine instituttıń oqıw isleri boyınsha prorektorı M.Jumamuratov, xalıqaralıq birge islesiw bólimi baslıǵı A.Bimbetov, fakultet dekanatı hám kafedralar baslıqları, professor-oqıtıwshılar qatnastı.

Ilajǵa Malayziyanıń Lincoln University College oqıw ornı xalıqaralıq baylanıslar boyınsha prorektorı, professor Rashid Abdusalomov onlayn formatta qatnasıp, Ózbekstan hám Malayziya arasında bilimlendiriw baǵdarları boyınsha birge islesiwdiń ámeliy nátiyjeleri haqqında maǵlıwmatlar berdi. Sonday-aq, oqıwǵa qabıl etilgen studentlerdi qutlıqlap, aldaǵı oqıwlarında tabıslar tiledi.

Bunnan soń studentlerge qospa tálimniń ózgeshelikleri, áhmiyetli tárepleri haqqında maǵlıwmatlar berilip, belgilengen joba tiykarında qánigelik pánler baslap jiberildi.

Institutta xalıqaralıq joqarı oqıw orınları menen birge islesiw boyınsha áhmiyetli jumıslar dawam etpekte.

NMPI baspasóz xızmeti.