Ájiniyaz atındaǵı Nókis mámleketlik pedagogikalıq institutı kishi májilisler zalında «9-dekabr – Xalıqaralıq korrupciyaǵa qarsı gúresiw kúni»ne baǵıshlanǵan shıǵarmalar tańlawı jeńimpazların sıylıqlaw ilajı bolıp ótti.

Ilajdı instituttıń Korrupciyaǵa qarsı gúresiw «Komplaens qadaǵalaw» sistemasın basqarıw bóliminiń baslıǵı P.Xojabekov basqarıp bardı hám jeńimpazlardı qolǵa kirgizgen nátiyjeleri menen qutlıqladı.

Ilajǵa jaslar menen islesiw boyınsha dekan orınbasarları, tyutorlar hám tańlawǵa belsendi qatnasqan student-jaslar qatnastı.

Sáne múnásibeti menen ótkerilgen tańlawǵa 700 ge jaqın (súwretler, esseler, qosıqlar, videorolikler, plakatlar hám t.b.) materiallar kelip tústi. Materiallar tiyisli qánigeler tárepinen obyektiv bahalandı.

Videorolikler tańlawında 1-orındı Tariyx fakulteti, 2-orındı Súwretlew óneri hám texnologiyalıq tálim fakulteti, 3-orındı Fizika-matematika fakulteti studentleri iyelegen bolsa, plakatlar tańlawında 1-orındı Súwretlew óneri hám texnologiyalıq tálim fakulteti, 2-orındı Mektepke shekemgi tálim fakulteti, 3-orındı Pedagogika fakulteti studentleri iyeledi. Tańlawlarda jeńimpaz bolǵan hám sıylı orınlardı iyelegen fakultetlerge sáykes túrde televizor, elektr pechi hám utyuglar sawǵa etildi.

Ilaj Korrupciyaǵa qarsı gúresiwge jámiyetshiliktiń keń qatlamların tartıw maqsetinde Qaraqalpaqstan telekanalınıń «Xabar» informaciyalıq baǵdarlamasında sáwlelendirildi.